PEKALONGAN – Panggabungan Kabupatèn Batang mlebet Kabupatèn Pekalongan ngasilaken pangiritan (èfisiènsi) anggaran, katingal saking rancangan anggaran ènggal.
panggabungan kakalih kabupatèn wau ngasilaken èfisiènsi anggaran 15.870 gulden
Het Javaanse Blad
Wonten ing lembaran risalah katerangan amandemèn utawi pangowahan anggaran blánjá ingkang kaping sepindhah taun 1936 sasampunipun Batang mlebet Kabupatèn Pekalongan kababaraken kados kapethik saking De Locomotief, dinten Jemuah (27/3/1936) makaten:
Kanggé taun dines 1936 dipuntetepaken kanggé Kabupatèn Pekalongan lan bekas Kabupatèn Batang anggaran ingkang kapisah piyambak-piyambak, ing babagan blánjá lan panampi miturut paprincèn ingkang cacahipun 108.012 gulden kanggé Pekalongan, lajeng 115.738 gulden kanggé Batang, utawi sesarengan totalipun 223.750 gulden.
Anggaran kanggé Kabupatèn Pekalongan sampun dipuntampi kanthi pikantuk pangabsahan saking utusan Provinsi, éwodènten anggaran kanggé Kabupatèn Batang sarèhning sampun dipunbibaraken lajeng dipunlebetaken Kabupatèn Pekalongan pikantuk pangabsahan kados sawaunipun.
ngirit subsidi pamréntah utaminipun subsidi dumateng wilayah-wilayah otonom
Het Javaanse Blad
Anggaran Kabupatèn Pekalongan ingkang sampun dipunabsahaken salajengipun taksih kedah dipunowahi kanthi mlebetaken anggaran Kabupatèn Batang ingkang sampun dipunbibaraken, sasagedipun kanthi ngetrapaken pangiritan lan ngirangi pambiayaan.
Intinipun saking pangowahan puniká, kados ingkang dipunkarsaaken déning pamréntah kanthi panggabungan kabupatèn kakalih (Batang mlebet Pekalongan) inggih puniká supados ngasilaken èfisiènsi subsidi pamréntah utaminipun subsidi dumateng wilayah-wilayah otonom.
Wonten ing anggaran ingkang sampun dipuntetepaken, cacahipun subsidi nagari kanggé Kabupatèn Pekalongan dipunprakiraaken 21.395 gulden lan kanggé Kabupaten Batang 29.575 gulden, sesarengan totalipun 50.970 gulden.
Saking pepadhan tumrap jumlah akhir pangowahan anggaran sapuniká ingkang cacahipun 99.868 gulden, mindhak saking anggaran Kabupatén Pekalongan sadèrèngipun, kalih jumlah akhir anggaran Kabupatèn Batang sadèrèngipun inggih puniká 115.738 gulden, saget dipunsimpulaken bilih panggabungan kakalih kabupatèn wau ngasilaken èfisiènsi anggaran 15.870 gulden.
Èfisiènsi puniká maujud ing panampi anggaran arupi pangirangan subsidi pamréntah dugi 17.752 gulden, ingkang sabagéanipun dipuntampi kanthi mindhakaken pos-pos saráná dugi 1.882 gulden, ingkang sadèrèngipun dipunanggaraken sakedhik sanget. (es/es)