UTRECHT – Juru pangukuh lan pangawat-awat pranatan ing Walandi, presisipun kutháprájá Utrecht, wiwit mongsá bentèr taun ngajeng kénging nganggé jilbab utawi keppel (kopiah Yahudi) minongká bagéan seragam resmi.
Utrecht dados kutháprájá ing Walandi ingkang kaping sepindhah njangkah dugi pranatan wau, makaten serat kabar Algemeen Dagblad kados kapethik Het Javaanse Blad dinten Jemuah (12/11).
Miturut pranatan wekdal sapuniká, párá pangukuh pranatan kutháprájá ing Walandi boten kénging ngagem pasemon agami ingkang nyolok cethá kados jilbab utawi keppel (kopiah Yahudi, red). Nanging Déwan Kutháprájá Utrecht naliká rembagan dinten Kemis dalu (Jemuah énjing wekdal ing Jogja) mawi usul saking partai Denk netepaken badhé ngakhiri pranatan wau.
Kanthi swanten paling kathah, partai-partai politik ing Déwan Kutháprájá dhawuh dumateng walikuthá Sharon Dijksma supados sampun ngetrapaken pranatan wau sadèrèngipun Mongsá Bentèr tahun ngajeng, 2022.
Miturut pangarsá fraksi Denk Mahmut Sungur usulan pihakipun ingkang dipuntampi déning Déwan Kutháprájá wau minongká satunggaling samubarang ingkang fantastis.
“Kitá merloaken langkung kathah pangukuh pranatan, kanthi cárá makaten kanggé tiyang-tiyang kanthi latar wingking migrasi pakaryan wau dados saget kacepeng langkung sae. Kejawi makaten minongká kutháprájá kitá gadhah gegayuhan rupi-rupi personel. Dados saé sanget bilih kitá jebul ingkang paling majeng ing Walandi. Kanthi makaten kitá sampun maringi tuládhá sáhá nyepeng kendali pangowahan masyarakat,” makaten Mahmut Sungur.
Mawi pranatan wau partai Denk ngarsaaken saget maringi wisik dumateng párá mitrá kutháprájá sanèsipun kados pulisi. Párá pangarsá kapulisian Amsterdam sadèrèngipun ing tahun 2017 sampun naté tetimbangan badhé ngidini párá punggawanipun ngagem jilbab minongká bagéan seragam resmi. Nanging rencáná wau wekdal semanten pikantuk tentangan saking kalangan pulisi piyambak lan politik ing mriká, saénggá rencáná wau mlebet laci malih.
Wonten ing kalangan pulisi jebul nganggé jilbab taksih tabu, sarèhning seragam kados pripun mawon kedah tetep seragam, lan pasemon agami dipunpirsani saget ngrisak citra netral pulisi. Padhahal wonten ing negari-negari sanèsipun wiwit dangu sampun biasa párá punggáwá kénging ngagem pasemon agami kados jilbab, antawisipun ing Amérika, Kanada, Inggris, Australia, Irlandia, lan Singapura.