AMSTERDAM – Nembé ngraosaken kamardhikan gesang normal, kabinèt demisionèr netepaken papréntahan énggal: wiwit dinten Setu 6/11 wajib nganggé masker malih.
Papréntahan énggal wau kados dipuntampi Het Javaanse Blad saking serat pawartá kutháprájá Amsterdam kanthi cekak aos makaten:
Masker
Wajib nganggé masker tumrap sinten kémawon wiwit yuswá 13 taun naliká: nitih waháná umum utawi mlebet stasiun/terminal/bandara, pabukon, kantor, supermarket, toko, kapsalon, sekolah tengahan dugi sekolah inggil lan universitas, kejawi jam kuliah.
Wonten ing panggénan-panggénan ingkang mlebet mriku kedah nedhahaken kode QR utawi kartu Corona boten wajib nganggé masker.
Kartu Corona
Kartu Corona wiwit dinten Setu, 11 November 2021 ugi wajib ing:
- téras njawi horéca (wiwit yuswá 13 taun),
- mlebet taman olahrágá, lapangan olahrágá, gedhong olahrágá (wiwit 18 taun),
- latihan seni sareng-sareng kados lès musik, lès nggambar, gladi resik koor, tantun lan tonil (wiwit 18 taun).
Kartu Corona sapuniká sampun wajib ing horéca (hotèl, restoran, café), casino, tandhing olahrágá, bioskop lan tonil. Kartu Corona boten wajib wonten ing panggaotan párá enèm dugi yuswá 18 taun.
MSG
Wiwit dinten sapuniká dipunaturi makaryá saking griyá (MSG) kados sawaunipun, paling kirang sepalih (50%) saking wekdal makaryá. Éwodènten pirembug kanggé lelampahan domèstik: éndani wekdal ramé lan wekdal pepeg kathah tiyang.
Aturan Dhasar
Tetep ngugemi aturan dhasar: njagi let 1,5 meter, langkung asring nyuci astá, ampun salaman, wahing lan watuk tutupi nganggé lengen/siku, lan ventilasi ingkang saé.
Menawi pikantuk gejala, énggal tès ten GGD (ugi menawi panjenengan sampun pikantuk vaksin). Menawi kasilipun tès jebul positif, pramilá swa karantina lan ampun kontak sinten kémawon (ugi menawi piyambakipun sampun pikantuk vaksin).