LONDON – Pasaréan Pangéran Philip, Haryápatih Edinburgh, garwanipun Ratu Elizabeth II, badhé dipuntindakaken ing St George’s Chapel, Windsor, mangké dinten Setu, 17 April, jam 15.00, makaten Kraton Buckingham, kapethik énjing puniká, Setu (11/4/2021).
Dipunwiwiti jam 15.00 kanthi hening ciptá, lajeng upácárá pasaréan wonten dalem St. George’s Chapel ing Kastil Windsor. Pasaréan puniká boten pasaréan kanegaran, sarèhning Pangéran Philip piyambak boten kersá. Párá wargi ugi boten saget ndhèrèk mirsani.
Cacahipun dayoh ingkang badhé rawuh namung 30, netepi protokol Corona ing Inggris. Kraton Buckingham ugi wanti-wanti bilih párá rawuh sadangunipun upácárá nyaréaken Pangéran Philip kedah ngugemi protokol wau, ingkang tegesipun kaluargi Kraton piyambak ugi badhé ngagem masker.
Sawetawis Perdana Menteri Boris Johnson sampun mbáyáwáráaken bilih piyambakipun boten badhé tindak dateng Kastil Windsor ngrawuhi pasaréan Pangéran Philip, supados panggénanipun saget dipunaturaken kanggé kaluargi Kraton sanèsipun.
Éwodéné Gusti Kanjeng Ratu Elizabeth II sampun netepaken dinten belásungkáwá nasional dugi panyaréan Pangéran Philip samangké. Kaluargi Kraton piyambak badhé nindakaken wekdal belásungkáwá kalih minggu dangunipun.
Kraton Buckingham sampun mesthèaken bilih Pangéran Harry, putu wayahipun Pangéran Philip, bakal rawuh, sawetawis garwanipun nggih puniká Meghan Markle, ingkang taksih ngandhut laré nomer kalih, tetep lenggah ing Amerika. Kadosipun Meghan pikantuk wanti-wanti saking dokter supados boten tindak.