DEN HAAG – Peperduur saking mricá. Sampun pirsá bilih ing Eropa jaman Abad Tengahan mricá (Piper nigrum) awis sanget, ugi naté dados alat bayar?
Inggih dados alat bayar ingkang sah, antawisipun kanggé mbayar maskawin, pajek, dugi dol tinuku griyá, ugi langkung awis tinimbang emas-pérak.
sawer = ulá (ngoko)
Het Javaanse Blad
Párá Ratu lan bandárá sami dhawuh dumateng prajurit supados njagi “emas cemeng” puniká siang dalu, ewodènten párá priyantun sugih biasa nyimpen ing sak busananipun, makaten kaserat ing Historianet.
Mricá lan Mitos
Ugi wekdal semanten, jaman Abad 15, tiyang-tiyang Eropa menggalih bilih wiji ingkang saget kanggé bumbu lan obat puniká asalipun saking swargá.
Malah Bartholomew nyerat ing ensiklopedia bilih wiji wau nèmpèl ing satunggaling wit, dipunjagi déning sawer. Naliká methik kedah mbakar wit wau rumiyin, supados sawer-sawer pejah utawi bibar.
Saking awisipun ngantos dados tembung énggal ing Walandi: peperduur (peper = mricá, duur = awis), awis kados mricá, 1810, ngèngetaken jaman naliká wiji puniká awis sanget, saget kanggé alat bayar.
Katrangan puniká kaserat déning P.A.F. van Veen lan N. van der Sijs, Etymologisch woordenboek: de herkomst van onze woorden, 2e druk, Van Dale Lexicografie, Utrecht/Antwerpen, 1997.
Peperduur, 1802, awis sanget, minongká paribasan ingkang ngèngetaken wekdal naliká mricá awis sanget (Gids, Oct. 1902, kacá 104; W. Heyd-Raynaud, Histoire du commerce du Levant, Leipzig, 1885-1886, II, kácá 658).
Lajeng antawis abad kaping 17 lan 18, párá juragan Eropa Amérika dados sugih sanget amargi mricá. Tuládhá ingkang misuwur inggih puniká juragan Amérika, Elihu Yale.
Piyambakipun wiwit 1672 dados sugih sanget amargi wiji ajib wau. Yale lajeng nganggé artanipun antawisipun kanggé ndamel Yale University (1701), New Haven, Connecticut, AS (es/es).