Dinten Jemuah kálá wingi Perdana Menteri Mark Rutte kados biasa nitih sepéda dhateng kraton Paleis Huis ten Bosch ing Den Haag kanggé ngaturaken bibaripun kabinet dados demisioner dumateng Rájá Willem Alexander.
Sepédanipun PM Rutte nggih puniká merk Koga seri F3. Piyambakipun sampun tigang taun kagungan sepédá puniká, dados sanès sepéda énggal. PM Rutte ngginaaken sepéda kanggé piranti tindak makaryá saben dinten saking griyá dhateng kantor.
Walandi pancén misuwur minongká negari sepéda lan Perdana Menterinipun maringi tuládhá ingkang saé kanggé bongsá-bongsá sanèsipun sadonyá. Minggu-minggu kapengker PM Rutte ketingal langkung asring wira-wiri nyepedá kanggé rapat krisis kabinet ten dalem dinas perdana menteri: Catshuis, boten tebih saking KBRI.
Minongká Perdana Menteri, Mark Rutte jané ugi pikantuk mobil dinas merk BMW, nanging mobil damelan Jerman puniká langkung kathah ngaso ten garasi. Rutte langkung remen nitih sepéda, ugi naliká wonten kunjungan resmi. Bilih Perdana Menteri negari sugih tur majeng langkung remen nyepéda ten mriki sampun biasa, nanging ten njawi mriká dados pawartos ageng sajagad.
