DEN HAAG – Kadutaan Ageng Republik Peru, Leonardo Royal Hotel Den Haag Promenade sáhá Diplomat Magazine sesarengan badhé ngawontenaken The Peruvian Food Festival ing tanah Walandi edisi kaping 4.
“Monggo rawuh sáhá manggihi kados pundi Peru ngantos kadhapuk minongká World Leading Culinary Destination (Tujuan Kulinèr Utami sa-Donyá) kaping 8 déning World Travel Awards ingkang prestisius,” makaten serat pawartá Diplomat Magazine ingkang dipuntampi Het Javaanse Blad dinten Rebo (27/10).
Párá rawuh saget nyobi raos otèntik dhaharan Peru tanggal 28-29-30-31 Oktober 2021 namung €39,50 (Rp 651.750) per person.
Chef (jurumasak) asli saking Peru Lourdes Pluvinage sareng chef Sido de Brabander bakal rawuh kanggé ndhèrèkaken panjenengan mlampah-mlampah kulinèr, ing mriku panjenengan saget ngemataken raosipun menu buffet (prasmanan, red) ingkang dipuncaosaken nganggé bumbu-bumbu seger saking Peru.
Chef Lourdes Pluvinage puniká ingkang kagungan restoran Peru “El-Picaflor” ingkang sampun misuwur ing kuthá Paris (Prancis) sáhá pandhamping panyerat buku resèp masak La Cuisine du Pérou à Paris.
“Ampun ngantos katilaran nyobi ngraosaken Ceviche lan Chupe de Camarones ingkang éco sanget antawis caosan sanèsipun,” makaten Diplomat Magazine.