DEN HAAG – Perdana Menteri Mark Rutte tuwi dateng Yunani, Albania, sáhá Macedonia-Lèr, dinten Selásá-Rebo (9-10/11).
Dinten Selásá PM Rutte badhé rawuh ing Yunani rembugan kaliyan PM Mitsotakis antawisipun babagan gegayutan bilateral antawis nagari kekalih, iklim, migrasi, sáhá pananggulangan pagebluk virus Corona, makaten serat pawartá Rijksvoorlichtingsdienst ingkang dipuntampi Het Javaanse Blad, dinten Jemuah (5/11).
PM Rutte sareng PM Mitsotakis ugi badhé ngrembug rencáná tuwi kanegaran déning Ngarsá Dalem Rájá Willem-Alexander lan Gusti Kanjeng Ratu Máxima mangké dinten Senèn dugi Rebo (13-15 Desèmber 2021). Tuwi kanegaran puniká badhé dipunpungkasi mawi pasegahan resmi.
Salajengipun dinten Rebo, 10 november PM Rutte badhé tuwi dateng Albania, antawisipun badhé rembugan kaliyan párá wakil kalangan manengah, dipundhèrèkaken upácárá panembrámá nyambut rawuhipun déning PM Rama.
Salebeting pasegahan dhahar siang kekalih pangarsá, PM Rutte – PM Rama antawisipun badhé ngrembug babagan gegayutan bilateral ingkang saé antawis Walandi – Albania, gotong royong Eropa, makaryá sareng ing babagan kapulisian, yustisi, bebangun wilayah, sáhá makaryá sareng ing NATO.
Minongká pungkasan, PM Rutte langsung nglajengaken tuwi dateng Macedonia-Lèr, antawisipun badhé rembugan kaliyan párá wakil taruná saking kalangan manengah. Tuwi puniká dipuntutup mawi pasegahan dhahar dalu resmi, ing mriku PM Rutte – PM Zaev ngrembug babagan gegayutan Walandi – Macedonia-Lèr, makaryá sareng tingkat Eropa, bebangun wilayah, sáhá makaryá sareng ing NATO.
Mark Rutte, lair ing Den Haag, 14 Februari 1967, puniká politikus Walandi pangarsá partai Volkspartij voor Vrijheid en Democratie/VVD (Partai Rakyat kanggé Kamardhikan lan Démokrasi) ingkang paling dangu sasampunipun PM Ruud Lubbers jumeneng dados Perdana Menteri wiwit 14 Oktober 2010.
Senaosá sampun ngastá Perdana Menteri, nanging Mark Rutte wiwit Sèptèmber 2006 tetep dados guru mulang dateng SMA Johan de Witt – Zusterstraat en Hooftskade ing kuthá Den Haag (sadèrèngipun Johan de Witt Scholengroep – Varias College), ngastá pelajaran Maatschappijleer (Ilmu Sosial).
Rutte puniká putrá ragil saking Izaac Rutte (1909-1988) lan Mieke Dilling (1923-2020). Izaac, bapakipun Rutte, naliká jaman Indiya-Walandi (sapuniká Indonesia) naté makaryá dados wakil lajeng dirèktur perusahaan dagang. Éwodènten ibunipun Rutte, Mieke Dilling, inggih puniká putrinipun mandor Heidemaatschappij. Naliká taun 1950-an kaluargi puniká kundur malih dateng Walandi, sarèhning Présidèn Soekarno nindakaken nasionalisasi sedáyá perusahaan Walandi.