DEN HAAG – PM Walandi Mark Rutte tuwi dateng Ukraina, sasampunipun Presidèn Jokowi. Minongká sokongan tumrap Presidèn Volodymyr Zelensky sáhá kawulá Ukraina.
Puniká tuwi PM Rutte ingkang kaping sapindhah sasampunipun invasi Rusia, Ferbuari kapungkur. Piyambakipun rawuh ing Kyev dinten Senèn, suryá kaping 11 Juli 2022.
“Piyambakipun mawi tuwi puniká ngaturaken dukungan dumateng kawulá Ukraina sáhá pamréntahan Presidèn Zelensky, ingkang wekdal siangipun karsá ngendikan bilateral,” makaten siaran RTL Nieuws.
Miturut Rutte, mirsani foto-foto ugi damel prihatin, nanging sasampunipun rawuh piyambak ing mriká, nembé saget ngraosaken pripun akibatipun perang.
“Anyaksèni kahanan ancur, párá kawulá ingkang kapeksan ngungsi nilaraken sedayanipun, sedáyá wau namung saget dipunraosaken menawi rawuh piyambak mriki,” makaten Rutte.
Taksih miturut Rutte, piyambakipun ing mriká ugi ngamat-ngamati kados punápá wigatosipun Barat lan Walandi mbiyantu Ukraina.
“Puniká urusan bebudèn, urusan ingkang kitá bélani,” imbuh Rutte, PM Walandi saking VVD.
Kajawi Kyev, Rutte ugi tuwi dateng kuthá-kuthá Borodjanka, Boetsja sáhá Irpin. Piyambakipun sasampunipun ngendikan sareng Presidèn Zelensky badhé maringi konferènsi pèrs.
Ngendikan Rutte-Zelensky antawisipun ngrembag sokongan Walandi tumrap Ukraina. Dugi sapuniká Walandi sampun mbiyantu 172 juta euro arupi piranti militer kanggé Ukraina.
Párá pangarsá Eropa sanèsipun sadèrèngipun sampun tuwi mriki, kadostá Presidèn Emmanuel Macron (Prancis), PM Boris Johnson (Inggris) tuwin Ursula von der Leyen (Komisi Eropa).