DEN HAAG – Poep ingkang kados pundi ingkang séhat? ‘Dokter poep’ Nienke Gottenbos (39) andum kawruh saénggá sinten kémawon saget pikantuk poep ingkang ‘sampurná’.
Satunggaling tiyang saget saben dinten ‘tindak wingking’ (toilet), tiyang sanèsipun namung kalih dinten sepindhah. Sedáyá wau wonten kaitanipun kalih spijsvertering utawi ‘pangluluhing dhaharan’ (Indonesia: pencernaan makanan) ingkang boten sami antawisipun tiyang.
Lajeng kados pundi poep ingkang sampurná? Kados kotoran truwèlu, kados sup kacang tálá punápá kados sambel kacang?
“Poep ingkang langkung kitá kersaaken inggih puniká kados rupi sosis ingkang boten mbetahaken tisu satunggal rol kanggé ngresikaken, ingkang boten ngambang nanging langsung ambles katut toyá lan boten lèngkèt ing toilèt,” ngendiká Nienke Gottenbos kapethik saking Algemeen Dagblad dinten Ngahad (10/10).
Miturut Gottenbos, kados dipunjlèntrèhaken ing bukunipun ingkang bestseller (laris) De Poepdokter: Gezond van Mond tot Kont (Dokter Poep: Séhat Saking Tutuk Dugi Wingking, red) sedáyá faktor wau mertandhani kahanan ing usus.
“Menawi poep tetep ngambang, puniká tándhá kekathahen gas ing usus. Kirang ngunjuk, kirang serat, sáhá kirang vèt (lemak) ing dhaharan saget ndadosaken bebelen. Menawi poep tetep lèngkèt, panjenengan kedah ngosèk toilèt nganggé sikat puniká saget mertandhani bilih pangluluhing vèt lan gluten boten saé. Menawi panjenengan tansah kedah ngusap nganggé tisu, tansah kraos dèrèng resik, puniká tándhá boten cekap enzim kanggé ngluluhaken dhaharan kanthi saé,” makaten Gottenbos.
Lajeng ambetipun puniká pratándhá punápá? “Gadhahanipun kulá piyambak ugi boten tansah ambet wangi sekar, nanging menawi ambet zat kimia puniká cethá bilih pangluluhing protein boten bèrès,” imbuh Gottenbos.
Miturut Gottenbos, supados saget pikantuk poep ingkang saé puniká gabungan saking pinten-pinten faktor.
“Gerak badan, strès, pangan, sedáyá wau nggadhahi pengaruh. Wonten ing buku kulá sampun kulá jlèntrèhaken pripun caranipun usus makaryá, sayur-mayur punápá kémawon ingkang saé kanggé pangluluhing dhaharan, lan dhaharan punápá kémawon ingkang langkung kathah kedah kitá dhahar. Nanging ugi: pripun sikap ingkang paling saé naliká lenggah ing toilèt. Puniká sanès kados kitá umumipun sapuniká lenggah. Ingkang paling saé alamiah inggih puniká lenggah ndhodhok,” makaten Gottenbos.