DEN HAAG – Déwan Menteri sarujuk kaliyan usulipun Menteri Urusan Ngamancá kanggé ngaturaken Prof. Dr. B.M. (Barbara) Oomen sáhá mr (meester in de rechten) H.J.J. (Henne) Schuwer dados anggota Adviesraad Internationale Vraagstukken/AIV (Déwan Pirembug Pitakènan Internasional).
mr (meester in de rechten) = S.H (sarjana hukum)
mr. Schuwer nggantosaken mr. drs. J.C. (Hans) van Baalen ingkang sampun sedá tanggal 29 April kapungkur. Jumenengan piyambakipun badhé dipunleksanaaken mangké tanggal 1 Désèmber 2021, makaten serat pawartá saking Ministerraad ingkang dipuntampi Het Javaanse Blad, dinten Jemuah (29/10).
Sadèrèngipun mr. Schuwer dugi 2019 makaryá ing Kamentrian Urusan Ngamancá kanthi Uni Eropa lan Hubungan Trans-Atlantik minongká portofolio ingkang utami. Piyambakipun ugi naté lenggah dados Dutá Ageng ing Brussel lan Washington.
Éwodènten Prof. Oomen nggantosaken Prof. Dr. E.M.H. (Ernst) Hirsch Ballin ingkang kalenggahanipun badhé rampung mangké tanggal 31 Désèmber 2021. Jumenenganipun Prof. Oomen badhé dipuntindakaken tanggal 1 Januari 2022. Piyambakipun kekalih badhé ngastá ing Déwan Pirembug puniká dangunipun 4 taun.
Prof. Oomen puniká Guru Besar Sosiologi Hak-hak Asasi Manungsá wonten ing Universiteit van Utrecht ugi manten dékan dateng University College Roosevelt ing Middelburg.
Déwan Pirembuk Pitakènan Internasional puniká satunggaling organ pirembug mardhiká ingkang maringi pirembug dumateng pamréntah lan De Staten-Generaal (Parlemèn kaliyan Senat, red) babagan beleid ngamáncá, utaminipun ingkang wonten gegayutanipun kaliyan hak-hak asasi manungsá, katentreman sáhá kaamanan, gotong-royong ing pambangunan lan manunggaling Eropa.