ROTTERDAM – Siyam saé kanggé ati sáhá usus. Saking saénipun saénggá Guru Besar Penyakit Waduk, Usus, lan Ati ing Erasmus MC Rotterdam Prof. Maikel Peppelenbosch mrayogéaken supados nilaraken dhahar siang.
“Sarèhning langkung dangu let antawis wekdal dhahar, ndadosaken flora usus langkung saé lan panjenengan ugi ngraos langkung sekécá,” makaten ngendikanipun Prof. Maikel Peppelenbosch kados kapethik saking Algemeen Dagblad, Rebo (14/4/2021).
Kanggé jutaan umat Muslim sajagad sampun mlebet Ramadan, satunggaling sasi ing mriku piyambakipun boten dhahar sáhá boten ngunjuk, wiwit fajar dugi srengéngé ambles. Nanging punápá mawon paédahipun tumrap keséhatan menawi boten dhahar sedintenan?
Taun-taun ingkang kapengker párá peneliti sampun ngupados kanggé mangsuli pitakènan wau. Piyambakipun neliti flora usus tiyang ingkang siyam Ramadan lajeng mbandhingaken kalih dinten-dinten biasa naliká piyambakipun dhahar normal. Prof. Maikel Peppelenbosch mbabaraken kasilipun penelitian wau ing majalah The American Journal of Clinical Nutrition dinten puniká.
Piyambakipun nyimpulaken bilih siyam saé kanggé usus lan ati. Pripun saget makaten? Sarèhning usus dangu boten ngolah dhaharan, lajeng wonten wekdal cekap kanggé bakteri-bakteri saé ingkang ndamel asem gajih. Ugi salirá pikantuk tengárá bilih gajih kedah dipunlunturaken. Bakteri-bakteri wau lajeng nindakaken supados salirá nglunturaken gajih ing ati.
“Kanthi ngirangi asring dhahar, ndadosaken langkung kathah bakteri ingkang saé ing usus. Menawi flora usus langkung saé, panjenengan ugi ngraos langkung saé,” makaten Peppelenbosch.
Puniká boten namung kanggé tiyang-tiyang ingkang kelemon. “Tiyang-tiyang ingkang langsing ugi saget kagungan ati ingkang kathah gajih, tuladhanipun nggih puniká tiyang-yiyang ingkang kathah ngunjuk alkohol.”
Kasilipun penelitian wau dados jalaran Prof. Maikel Peppelenbosch boten dhahar siang malih. “Kulá saget maringi pitutur monggo makaten. Senaosá sebagéan tiyang bakal pikantuk gangguan kadar gendhis ing rahipun. Sampun saget nulung menawi dhahar siang dipunundur upaminipun dugi jam 15.00, nanging sebagéan tiyang (ingkang gerah diabét) kedah nggatosaken kadar gendhisipun,” makaten Prof. Maikel Peppelenbosch minongká pangarsá tim peneliti.
Senaosá makaten, Prof. Peppelenbosch ngendiká kasilipun penelitian puniká boten lajeng maringi teges bilih mligi siyam mawon saé kanggé keséhatan. Wonten risiko dehidrasi. Kejawi makaten ugi saget semaput menawi kirang dhahar. Ugi paedah kanggé usus bakal ical menawi dhahar normal malih.