GHENT – Miturut Prof. Dr. Wim Derave saget nyegah 25 penyakit, antawisipun kanker, jantung, stroke, kolèsterol inggil, dugi diabetes tipe II.
Manungsá saben dinten paling kirang kedah mlampah 10.000 jangkah. Sasampunipun nyimak kuliahipun Prof. Dr. Wim Derave (Faculty of Medicine and Health Sciences, University of Ghent) puniká panjenengan boten namung karsá mlampah 10.000 jangkah, nanging 15.000 jangkah!
Bilih kitá saben dinten kedah gerak puniká boten namung kanggé mbakar kalori lan njagi kondisi, nanging taksih wonten kathah manfaat sanèsipun ingkang langkung wigatos tinimbang kalori lan kondisi. Punápá?
mlampah saben dinten 10.000 jangkah saget nyegah kanker, jantung, stroke, kolèsterol inggil, dugi diabetes tipe II
Prof. Dr. W. Derave
Miturut Prof. Derave, saking pinten-pinten panelitèn kasilipun cethá bilih gerak badan boten namung saget ngreksá langkung saking 25 jinis penyakit, antawisipun kanker, nanging ugi ngirangi risiko pikantuk penyakit kronis kados penyakit kardiovaskulèr (jantung, pambuluh rah, stroke), kolèsterol inggil, lan diabétés tipe II.
Kanthi teratur gerak badan panjenengan saget ngirangi risiko pikantuk penyakit-penyakit wau dugi 50% utawi langkung kathah malih.
naliká gerak otot-otot ngeculaken zat-zat katemtu, antawisipun myokine
Prof. Dr. W. Derave
Dados pola gesang aktif puniká saget ndamel gesang langkung dangu. Gerak badan pancèn boten saget maringi kitá gesang sadangu-dangunipun, nanging nggadhahi èfèk saé tumrap prakiraan yuswá kitá ngantos 4 taun langkung dowi.
Kados pundi gerak badan saget ngreksá kitá? Miturut Prof. Derave, naliká kitá gerak puniká otot-otot kitá ngeculaken zat-zat katemtu. Zat-zat wau antawisipun myokine ingkang kalebet zat hormon. Myokine puniká mlebet dateng rah, lajeng kanthi makaten nglindhungi organ-organ sanèsipun. Zat-zat myokine puniká nggadhahi èfèk saget ngerèm tuwuhipun kanker, ugi ndorong pandamelan sèl-sèl utek.
gesang aktif saget ndamel yuswá langkung dangu
Prof. Dr. W. Derave
Masalah ageng inggih puniká bilih minongká akibat saking revolusi indutri lan revolusi digital kitá dados langkung sakedhik gerak badan tinimbang naliká jaman hunting-gathering (mbedhag-ngempalaken), jaman manungsá purbá. Sarèhning kitá kirang gerak lajeng pikantuk macem-macem penyakit kronis, amargi boten wonten zat-zat ingkang saget ngreksá wau.
Saben dinten mlampah 10.000 jangkah puniká minongká tujuan kanggé mbetá kitá dugi tingkat gerak kados naliká manungsá purbá ‘jaman mbedhag-ngempalaken’, hunting-gathering, supados zat-zat myokine tetep nggadhahi fungsi.
Gerak kados pundi ingkang leres puniká boten wigatos, pokokipun gerak mawon. Asal saget gerak ingkang kathah sáhá biasa gesang aktif, saget nggadhahi pola gesang ingkang bragas, fit. Dados menawi mlampah saben dinten 10.000 jangkah puniká saget mbiyantu sanget. (es/es)