PEKALONGAN – Résidèn Pekalongan Carel Otto Matray atas nami Gubernur Jawi Tengah jumenengaken Bupati Pekalongan sasampunipun katambahan Batang inggih puniká Raden Adipati Ario Soerjo ing pendhápá kabupatèn dinten Setu énjing (29/2/1936).
Kados kapethik saking De Locomotief, Résidèn Pekalongan Carel Otto Matray mawi pidatonipun ngaturi uningá babagan pambibaran Kabupatèn Batang lajeng wilayahipun dipunlebetaken dateng Kabupatèn Pekalongan sáhá dhasar kaputusanipun.
“Kados panjenengan sampun pirsá, Kabupatèn Batang dipunbibaraken per tanggal 1 Januari 1936 miturut kaputusan Gubernur nomer 3 tanggal 31 Désèmber 1935 lajeng wilayahipun dipunlebetaken dateng wilayah Kabupatèn Pekalongan,” ngendiká Résidèn Matray.
Salajengipun wiwit tanggal wau Kabupatèn Pekalongan pikantuk wilayah ènggal bekas wilayah Kabupatèn Batang ingkang jembar mangétan ngemu 10 kecamatan dugi tapel wates Kali Kuto, minongká tapel wates kalihan wilayah Kabupatèn Kendal.
Miturut Résidèn Matray, wonten kaawratan saking pinten-pinten pihak ingkang nolak pambibaran Kabupatèn Batang, nanging sarèhning wonten kabutuhan ingkang temen kanggé nindakaken pangiritan (èfisiènsi), pamréntah netepaken nglangkahi kaawratan wau senaosá pamréntah pirsá bilih kanthi pambibaran wau ugi ngorbanaken tradisi ingkang sampun madeg dangu.
“Kanthi kaputusan Gubernur nomer 3 taun 1935 ingkang nembé dipunwaosaken déning Sekretaris, pamréntah dapuk panjenengan supados nindakaken pamréntahan tumrap wilayah énggal lan dhawuh supados jumenengaken panjenengan minongká Bupati ing kabupatèn ingkang dipunwiyaraken,” makaten Résidèn Matray.
Sasampunipun upácárá jumenengan, dipunaturaken lencáná simbol panggabungan Kabupatèn Batang dados satunggal mlebet Kabupatèn Pekalongan déning anggota Déwan paling sepuh saking Batang inggih puniká J.M. Biekart minongká pangènget-ènget.
Lajeng Résidèn, Bupati, sáhá párá rawuh sami kempal kanggé foto: Résidèn C. O. Matray (tengah), sisih kiwánipun: garwá Bupati, sisih tengenipun: Bupati R. A. A. Soerjo, lan garwá Résidèn Ny. Matray-Bedier, lajeng staf Kemendagri lan tamu sanèsipun. Salajengipun dipunsusul pista dugi dalu. (es/es)