Putri Alexia badhé nglajengaken sekolah SMA-nipun wonten ing United World College of the Atlantic (UWC Atlantic College) ing kuthá Llantwit Major, Wales, Inggris.
Makaten Rijksvoorlichtingsdienst (dinas panyuluhanipun kraton, red) ngumumaken dinten Selásá kálá wingi kados dipunpundhut saking nu.nl énjing puniká, Rebo (3/3).
Putri Alexia, 15 taun, wonten mriká badhé mendhet ijasah Internationaal Baccalaureaat nggih puniká ijasah saderajat kalih ijasah SMA ingkang dipunakèni sa-Eropa. Putri nomer kaping kalih Ngarsá Dalem Rájá Willem-Alexander lan Gusti Kanjeng Ratu Máxima sapuniká lenggah wonten ing kelas sekawan Christelijk Gymnasium Sorghvliet ing Den Haag, satingkat SMP.
United World College of the Atlantic puniká sekolah ingkang paling sepuh saking United World Colleges, satunggaling golongan sekolah ingkang ndhidhik párá siswanipun remen damé lan tanggung jawab masyarakat.
Kathah siswá saking sekolah puniká nindaaken pakaryan ékstrakurikulèr lan ngupáyá sumbangsih kanggé masyarakat, contonipun nglampahi kriyá dados rélawan. Párá siswá sekolah mriki saget mundhut 6 pakèt pelajaran, nggih puniká pakèt básá utawi pakèt ilmu kawruh.
Ngarsá Dalem Rájá Willem-Alexander, bápánipun Putri Alexia, ugi naté lenggah wonten ing sekolah mriki, ugi Putri Elisabeth saking Belgia. Putri Leonor saking Spanyol (15) wekdal sapuniká ugi nglajengaken sekolah wonten mriki lan badhé dados réncang sakelas kalih Putri Alexia.
Putri Alexia nglampahi sekolah dhasaripun wonten ing SD biasa Bloemcampschool ten Wassenaar, kados kakang mbakyunipun Putri Amalia lan adhikipun Putri Ariane. Piyambakipun sedáyá ugi nglajengaken SMP-nipun wonten ing sekolah umum ingkang sami: Christelijk Gymnasium Sorghvliet, Den Haag.
Rijksvoorlichtingsdienst wanti-wanti bilih ing Wales ugi wonten kode étik, boten kénging sakersanipun piyambak motrèt sang Putri. “Wekdal sekolah párá putri kalebet pribadi. Tiyang sepuh párá putri nyuwun kanthi sanget dumateng media supados gesang pribadi párá laré kedah dipunhurmati,” makaten Rijksvoorlichtingsdienst. (es)