AMSTERDAM – Gusti Kanjeng Putri Beatrix paring anugerah Zilveren Anjers (Anyelir Perak) ing Kraton Amsterdam, dinten Kemis suryá kaping 9 Juni 2022.
Anugerah saking Prins Bernhard Cultuurfonds (Yayasan Kabudayan Pangéran Bernhard) puniká dipunparingaken dateng Daphne Wassink, Klaas Post sáhá Adolf Kock.
Daphne Wassink kathah jasanipun tumrap Paguyuban Koor Walandi. Sasampunipun sepen pinten-pinten sasi amargi pandemi Covid-19, paguyuban puniká saget nembang malih amargi Wassink.
Klaas Post mbangun lan mbiayai kolèksi 10.000 fosil mamalia laut ingkang wigatos sanget kanggé Natuurhistorisch Museum Rotterdam (Muséum Sejarah Alam Rotterdam).
“Kolèksinipun migunani kanggé ngèlmu kawruh sáhá sèktor muséum sejarah alam,” makaten kados dipunaturaken Rijksvoorlichtingsdienst dateng Het Javaanse Blad.
Éwodènten Adolf Kock maringi sumbangsih ingkang wigatos sanget kanggé nguri-uri warisan kabudayan Aruba, antawisipun ngempalaken 1 juta foto saking tahun 1800 dugi dinten sapuniká.
Anugerah Zilveren Anjers dipunaturaken wiwit taun 1950 dateng tetiyang ingkang nguri-uri kabudayan utawi alam ing Walandi tanpá pamrih.
Pangéran Bernhard ngaturaken piyambak anugerah puniká dugi wekdal kapundhut tahun 2004. Salajengipun Putri Beatrix ingkang nerasaken dugi dinten sapuniká. (es/es)