DEN HAAG – Gusti Kanjeng Putri Beatrix positif tès Corona. Piyambakipun ngraos flu sakedhik lajeng dhawuh tès, kasilipun jebul positif Covid-19.
Kabar ibu Ngarsá Dalem Willem-Alexander positif tès Corona wau dipunbabaraken déning Rijksvoorlichtingsdienst mawi serat pawartá ingkang dipuntampi Het Javaanse Blad dinten Setu (4/12/2021) dalu jam 21.07.
“Putri Beatrix wekdal sapuniká ing dalem nindakaken isolasi sáhá netepi paugeran kanggé tiyang-tiyang ingkang positif tès. Sawetawis tiyang-tiyang ingkang gegayutan caket kaliyan Putri Batrix sedayanipun sampun dipunparingi pirsá,” makaten Rijksvoorlichtingsdienst, dinas panyuluhan pamréntah Karajan Walandi.
Gusti Kanjeng Putri Beatrix (83) minggu kálá wingi nembé mawon kundur saking tuwi kriyá dateng Curaçao. Kapethik saking televisi publik NOS, Gusti Kanjeng Putri ing mriká rembugan kaliyan párá wakil medis ingkang ndhèrèk langsung nanggulangi krisis Corona lan dhawuh bilih piyambakipun sampun pikantuk suntikan booster.
Amargi kasilipun tès positif wau, Gusti Kanjeng Putri Beatrix boten saget ngrawuhi dinten ambal warsá ingkang kaping 18 wayah kinasih panerus dampar inggih puniká Putri Amalia, putri mbajeng Ngarsá Dalem Willem-Alexander lan Ratu Máxima.
Sadinten salajengipun ugi wonten kadadosan wigatos kanggé kang wayah inggih puniká kadhapuk dados anggota Raad van State (Déwan Pirembag Ageng, red). Ngarsá Dalem Willem-Alexander minongká pangarsá Raad van State badhé ngamping-ampingi Putri Amalia ingkang ugi badhé ngaturaken pidato ing wekdal wau.
Sasampunipun lèngsèr kaprabon ing dinten Selásá 30 April 2013, lenggah dampar minongká Ratu Walandi wiwit 30 April 1980, Ratu Beatrix nyandang titel Prinses der Nederlanden, Prinses van Oranje-Nassau lan Prinses van Lippe-Biesterfeld, cekak aos: Prinses Beatrix (Putri Beatrix). Salajengipun dampar karaton dipunterasaken déning kang putrá, Ngarsá Dalem Rájá Willem-Alexander.
Gusti Kanjeng Putri Beatrix wiwit 4 Februari 2014 kanthi resmi mundhut Kasteel Drakensteijn minongká dalemipun, satunggaling kastil ingkang kalenggahan ing tengah alas Lage Vuursche, kutháprájá Baarn, boten tebih saking Amersfoort.
Kastil puniká ing taun 1959 déning Frederik Lodewijk Bosch van Drakestein dipunsadé dateng Putri Beatrix (wekdal semanten yuswá 21), lajeng Putri Beatrix dhawuh supados dipunrénovasi. Piyambakipun mlebet kastil puniká wiwit taun 1963.
Ugi sasampunipun ningkah ing taun 1966 kaliyan Pangéran Claus van Amsberg, Putri Beatrix tetep manggèn gegriyá ing kastil puniká. Sasampunipun jumenengan dados Ratu ing taun 1980, piyambakipun kaliyan kaluarginipun nembé pindhah ing taun 1981 dateng Karaton Huis ten Bosch ing Den Haag.