DEN HAAG – Gusti Kanjeng Putri Beatrix der Nederlanden karsá rawuh ing prèngetan 125 taun Noordbrabantse Christelijke Boerenbond/NCB (Paguyuban Tani Kristen Braband Lèr) wonten ing Museum Paguyuban Tani ing kuthá Gemert mangké tanggal 10 November 2021.
Makaten serat pawartá Rijksvoorlichtingsdienst ingkang dipuntampi Het Javaanse Blad dinten Kemis (28/10).
Paguyuban tani puniká dipunadegaken déning pater (pandhitá) Gerlacus van den Elsen taun 1896 kanthi tujuan kanggé majengaken karaharjan párá tani mawi gotong-royong antawis párá tani alit.
Wiwit taun 1999, NCB sareng Christelijke Boeren- en Tuindersbond/CBTB (Paguyuban Tani lan Tani Sayuran Kristen) lebur dados organisasi énggal ingkang nami Zuidelijke Land- en Tuinbouw Organisatie/ZLTO (Organisasi Tetanèn lan Pakebonan Kidul).
Ing panggènan prèngetan tanggal 10 November wau, inggih puniká Muséum Paguyuan Tani ing kuthá Gemert, wonten griyá panggènan lahiripun pater Van den Elsen. Sadangunipun prèngetan badhé wonten guneman babagan jaman kapungkur, sapuniká, lan dinten bènjing paguyuban sáhá kawigatosanipun sèktor agraria ing wilayah provinsi Brabant Lèr.
Gusti Kanjeng Putri Beatrix (sasampunipun lèngsèr kaprabon nyandhang titel Putri, sanès Ratu malih, red) salajengipun karsá tilik Muséum Paguyuban Tani ingkang nyariyosaken babagan makaryá sáhá gesang ing dhusun wilayah Brabant taun 1900-an. Sadangunipun tilik muséum, Gusti Kanjeng Putri Beatrix karsá guneman sareng párá kaluargi tani.
Minongká panutup, Putri Beatrix badhé nanem wit minongká prasasti prèngetan 125 taun NCB, dipundhèrèkaken déning 3 generasi anggota ZLTO sáhá pangarsá ZLTO Wim Bens. Putri Beatrix puniká pangayom ZLTO.
Gusti Kanjeng Putri Beatrix asmá jangkepipun Beatrix Wilhelmina Armgard, Prinses der Nederlanden, Prinses van Oranje-Nassau, Prinses van Lippe-Biesterfeld, lahir ing kuthá Baarn, 31 Januari 1938), jumeneng dados Koningin der Nederlanden (Ratu Karajan Walandi) saking 30 April 1980 dugi 30 April 2013. Piyambakipun putri mbajeng Ratu Juliana & Pangéran Bernhard van Lippe-Biesterfeld. Ratu Beatrix lèngsèr keprabon tanggal 30 April 2013, dipunlajengaken déning kang putrá Ngarsá Dalem Rájá Willem-Alexander.