DEN HAAG – Kita sami kagungan tanggung jawab tumrap gesang ing bumi, pramilá kitá kedah damel pilihan sadhar.
Makaten ngendiká Putri Irène ing pacelathon online minongká kampanye Nederland Plant Bomen (Walandi Nanem Tetuwuhan). Putri Irène mirsani bilih amargi krisis Corona sapuniká, párá wargi dados sangsáyá sadhar migatosaken alam.
“Kitá sareng-sareng ramé budhal dateng njawi lan mirsani pripun wigatosipun mlampah-mlampah ing kisik, ing tegalan, ing alas, ing árá-árá, lan pripun saénipun kanggé kaseimbangan jasmani lan rohani. Kulá nyuwun mugi-mugi párá wargi saget ngraosaken dumukan kalih alam lan saget mirsani faédahipun,” makaten Putri Irène kados dipunpethik saking Blauwbloed, Senèn (8/3/2021).
Kejawi makaten Putri Irène ugi ngarepaken supados pengalaman puniká saget mbiyantu párá wargi kersá ngowahi caranipun gesang.
“Panjenengan kagungan pilihan: sepinten panjenengan gesang sadar lan sepinten sadaripun panjenengan badhé gesang? Gesang kados sadèrèngipun Corona boten saget malih. Kitá boten kénging malih saben liburan nitih montor mabur utawi saben dinten dhahar daging. Sedáyá wau conto-conto konkrit ingkang panjenengan saget menggalih sáhá saget ngowahi. Saben-saben priyantun mesthi saget. Kitá sedáyá sesami panyiptá kanggé wekdal bénjing. Lan puniká kadhang saget dados tantangan,” dhawuh Putri Irène.
Pramilá wigatos sanget menawi panjenengan minongká manungsá ngraos kagungan tanggung jawab tumrap bumi panggènan panjenengan gesang, utaminipun kejawi krisis Corona ugi wonten krisis iklim.
“Kitá manungsá faktor panemtu wekdal bénjing saking gesang ing bumi lan total gumantung kalih alam. Sangsáyá sekedhik turahing alam, sangsáyá rekásá lan angèl gesang kitá. Kitá kagungan tanggung jawab kanggé gesang ing bumi sapuniká ugi. Pramilá wigatos sanget menawi kitá menggalih pripun caranipun kitá ngatur,” makaten Putri Irène.