DEN HAAG – Gusti Kanjeng Putri Catharina-Amalia Beatrix Carmen Victoria, Prinses van Oranje, Prinses der Nederlanden, Prinses van Oranje-Nassau dinten sapuniká jangkep 18 taun.
Makaten serat pawartá saking Rijksvoorlichtingsdienst ingkang dipuntampi Het Javaanse Blad dinten Selásá (7/12/2021).
Sareng prèngetan dinten tanggap warsá piyambakipun, Ngarsá Dalem maringi gendérá pakurmatan kanggé Putri Oranje. Salajengipun Ngarsá Dalem ugi jumenengaken Putri Oranje dados Ridder Grootkruis in de Orde van de Nederlandse Leeuw sáhá Ridder in de Huisorde van den Gouden Leeuw van Nassau.
Minongká panerus dampar Karajan Walandi, Putri Oranje wiwit yuswá 18 taun pikantuk kalenggahan ing Raad van State (Déwan Pirembag Ageng). Piyambakipun bénjing dinten Rebo (8/12/2021) naliká rapat ing Raad van State badhé dipunamping-ampingi déning Ngarsá Dalem Willem-Alexander, ingkang ugi pangarsá Raad van State.
Ngarsá Dalem Willem-Alexander naliká dinten Jemuah (24/11/2021) mawi Koninklijk Besluit (Beslit Karajan) sampun netepaken gendérá pakurmatan kanggé Putri Oranje sáhá párá adikipun Putri Alexia lan Putri Ariane der Nederlanden, mangké menawi sampun jangkep yuswá 18 taun.
Gendérá-gendérá pakurmatan párá kaluargi karaton wau dipunbagi sekawan bagéan mawi palang kanthi bagéan tengahipun wonten lambang karajan. Warni gendéránipun warni oranye, ing bagéan tengahipun wonten palang biru Nassau lajeng tengah-tengahipun lambang karajan. Bagéan sisih tengen gendérá kagunting lancip.
Éwodènten gambar ing gendérá lambang Huis Oranje (Griyá Oranje) puniká antawisipun ing sisih kiwá inggil wonten trompèt sungu warni abrit bagéan corongipun, mawi corak warni pethak. Lajeng ing sisih kiwá andhap wonten gambar bèntèng warni abrit mawi satunggal kori lan kalih jendhélá.
Ridder Grootkruis in de Orde van de Nederlandse Leeuw
Ngarsá Dalem Willem-Alexander mawi Koninklijk Besluit (Beslit Karajan) tanggal 24 November 2021 wau dateng Putri Oranje ugi maringi anugrah Ridder Grootkruis in de Orde van de Nederlandse Leeuw.
Maringi anugrah dateng panerus dampar puniká sampun dados tradisi kaluargi karaton Karajan Walandi. Naliká taun 1898 Kanjeng Ratu Wilhelmina minongká wanitá ingkang kaping sepindhah pikantuk anugrah Ridder Grootkruis in de Orde van de Nederlandse Leeuw. Wiwit wekdal semanten sedáyá putrá-putri Rájá utawi Ratu mlebet yuswá 18 taun dipunanugrahi Ridder Grootkruis in de Orde van de Nederlandse Leeuw.
Huisorde van den Gouden Leeuw van Nassau
Putri Oranje mawi Koninklijke Beschikking utawi Dhawuh Karajan per 7 Desèmber 2021 ugi pikantuk anugrah Ridder in de Huisorde van den Gouden Leeuw van Nassau, inggih puniká sesarengan orde Rájá sáhá Kamaharyapatihan Luxemburg.