STOCKHOLM – Dinten puniká, 19 Juni 2020, Putri Pati Swedia Victoria lan Pangéran Daniel mrèngeti satunggal dásáwarsá ningkahanipun.
Pramilá kitá badhé andum cariyos lelampahan katresnan piyambakipun kekalih. Wekdal semanten Mángsá Semi taun 2002. Sasampunipun lulus saking Yale University, AS, lajeng magang makaryá wonten ing PBB, New York, lan ngalami ambyar hubungan, Putri Pati Victoria kundur malih wonten Stockholm. Media Swedia ngabaraken babagan calon énggalipun Putri Pati Victoria, wekdal semanten taksih yuswá 24 taun.
Naliká Mángsá Bentèr taun ingkang sami langkung cethá bilih Daniel Westling calon garwanipun Putri Pati Victoria. Daniel puniká pengusáhá lan remen olahrágá. Piyambakipun kekalih tepangan wonten ing fitness center kuthá Stockholm, kagunganipun Daniel. Ing fitness center alit puniká Daniel dipun tepangaken kalihan Putri Pati Victoria minongká personal trainer. Paribasan witing tresná jalaran sáká kuliná, antawis piyambakipun kekalih tuwuh bibit-bibit katresnan.
Daniel lan Putri Pati Victoria sami-sami rumaos cocok lan sangsáyá dangu sangsáyá katresnan. Masyarakat Swedia ugi saget nampi lan ngurmati Daniel naliká nulungi Putri Pati Victoria ngadhepi penyakit anorexia. Tanggal 1 Juli 2008 Daniel wiwitan pindhah wonten ing apartemèn séwá caket kalihan kraton Drottningholm.
Lajeng ten tanggal 24 Februari 2009 medal pawartos ingkang sampun dipuntenggá-tenggá déning párá kawulá Swedia: Putri Pati Victoria tunangan kalihan Daniel, kawulá biasa. Bingah kanthi pasuryan moncèr Putri Pati Victoria nedhahaken ali-ali peningsetipun.
“Sareng Daniel ten sisihipun kulá, kulá rumaos tentrem. Taun-taun kepungkur kulá rumaos sangsáyá kiat lan sangsáyá bingah bagyá. Lajeng sapuniká wekdalipun mbangun samubarang sareng-sareng lan mbangun kaluargi,” ngendikanipun Putri Pati Victoria.
Putri Pati Victoria sanès ingkang sepindhah saking trah Karajan Swedia ingkang ningkahan kalih kawulá biasa. Ramanipun Putri Pati Victoria, Ngarsá Dalem Rájá Carl Gustaf, ugi katresnan lan ningkahan kalih kawulá biasa, sapuniká kasebat Ratu Silvia.
Daniel matur bilih piyambakipun nerveus naliká piyambakipun wonten satunggaling dinten ingkang éndah padhang njembrang ten plataran kraton Drottningholm atur sambat dumateng Putri Pati Victoria supados kersá dados garwanipun, “Kulá ngarep wangsulan “Nggih”, nanging kulá mboten yakin,” makaten Daniel.
Dinten sadèrèngipun Putri Pati Victoria lan Daniel ningkahan, dipunselenggaraaken konser kanggé piyambakipun kekalih. Parlemèn Swedia ugi paring gala-evenement wonten ing Stockholm Concert Hall.
Lajeng tanggal 19 Juni 2010: dinten ningkahanipun Putri Pati Victoria lan Daniel. Ingkang mbingahaken, Putri Pati Victoria lan Daniel sami-sami milih tanggal ningkahanipun sami kalihan tanggal ningkahanipun Bápá Ibunipun: Ngarsá Dalem Rájá Carl Gustaf lan Ratu Silvia. Kanthi langkung saking 1.000 tamu lan mèh 2 yutá pamirsá ten Stockholm, ningkahanipun Putri Pati Victoria lan Daniel dipunwastani ‘ningkahan kraton paling ageng ten Eropa’ sasampunipun Pangéran Pati Charles lan Diana Spencer.
Gaun ningkah Putri Pati Victoria dipunrancang déning Pär Engsheden. Naliká ngagem gaun pethak ingkang éndah pèni, Putri Pati Victoria ngagem tiara Cameo. Tiara ingkang sami ugi dipun agem déning ibunipun Putri Pati Victoria naliká dinten ningkahanaipun kalihan Ngarsá Dalem Rájá Karl Gustav taun 1976.
Wanci siangipun Puteri Pati Victoria lan Daniel nglampahi akad lan janji ningkah ten katedral kuthá Stockholm.
Putri Pati Victoria lan Daniel naliká ningkahan wau dipuniringi sedásá Putri Domas antawisipun Putri Amalia (Walandi) lan Putri Ingrid Alexandra (Norwegia). Párá Putri Domas ngagem gaun warni pethak damelan perancang ingkang sami kalihan gaun Putri Pati Victoria.
Pengantèn kekalih budhal saking gréjá nitih krétá tanpá payon, lajeng dipunbetá keliling kuthá Stockholm. Kathah khalayak sadowinipun route pengantèn langkung kanthi ngarep saget mirsani pengantèn kekalih.
Route krétá pengantèn Putri Pati Victoria nuju pelabuhan, wonten mriká Koninklijke Sloep (prahu khusus karajan) sampun nenggá, lajeng pengantèn énggal puniká nitih prahu nuju kraton.
Dinten ningkahanipun Putri Pati Victoria siang puniká dipunpungkasi kanthi balkonscène, tegesipun pengantèn karajan puniká medal wonten ing balkon, lajeng srawéan dumateng khalayak kanthi mèsem bingah moncèr pasuryanipun.
Dalunipun wonten pasugatan pista gala dinner kanthi taart pengantèn ageng sanget lan temtu kèmawon dansa Putri Pati Victoria lan Daniel kaping sepindhah minongká garwá miturut tradisi Swedia. Acara ningkahanipun Putri Pati Victoria puniká dipunsiaraken televisi Swedia dugi jam 01.00. (Bron: Blauwbloed.eo.nl)