DEN HAAG – Prinses van Oranje (Putri Oranje) kanggé wekdal kaping sepindhah dipuntepangaken ing Raad van State (Déwan Pirembag Ageng) déning Ngarsá Dalem minongká pangarsá, Gusti Kanjeng Ratu Máxima ugi rawuh, mangké dinten Rebo 8 Desember 2021.
Pasamuan boten limrah puniká badhé dipunawontenaken ing Balzaal van Paleis Kneuterdijk (Bangsal Ageng Kraton Kneuterdijk) Den Haag, makaten serat pawarta saking Rijksvoorlichtingsdienst ingkang dipuntampi Het Javaanse Blad (8/11).
Artikel 74 van de Grondwet (Pasal 74 UUD) netepaken bilih ‘panerus makutá’ wiwit yuswá 18 taun pikantuk kalenggahan ing Raad van State. Putri Oranje, pangarsá Raad van State sáhá wakil mr. Thom de Graaf salebeting pasamuan ageng puniká badhé ngaturaken pidato cekak aos.
De Raad van State puniká satunggaling majelis inggil Karajan Walandi lan cacahipun wonten 70 anggota, minongká majelis ingkang mardhiká maringi pirembug dumateng pamréntah sáhá parlemèn babagan pranatan lan pamréntahan, ugi minongká mahkamah administrasi paling inggil ing tanah Walandi.
Wewenang puniká dipuntindakaken déning 2 bagéan ingkang kapisah: Afdeling Advisering (Bagéan Paring Pirembug) lan Afdeling Bestuursrechtspraak (Pangadilan Administrasi/Tátá Usaha Nagari).
Putri Oranje minongká panerus makutá wiwit yuswá 18, inggih puniká sasampunipun tanggap warsá mangké tanggal 7 Desember 2021, pikantuk kalenggahan wonten ing rapat Raad van Staat ing bagéan Afdeling Advisering. Makaten Grondwet (UUD) sampun netepaken.
Panerus makutá kanthi makaten saget cecawis tumrap pedamelanipun samangké minongká Rájá utawi Ratu antawisipun mawi nambah kawruh pranatan lan hukum tátá negari kados makaten. UUD netepaken bilih Rájá/Ratu dados pangarsá Raad van State.
Puniká namung fungsi seremonial, sarèhning pakaryan saben dintenipun dipuncepeng wakilipun. Gusti Kanjeng Ratu Máxima pikantuk kalenggahan wonten ing Raad van State ing Afdeling advisering wiwit taun 2004. Putri Oranje, kados Ratu Máxima, mangké saget lenggah ngrawuhi rapat-rapat ing Afdeling Advisering. Ing praktèkipun piyambakipun boten kagungan gegayutan ingkang pokok, ugi boten kagungan hak suanten.
Sarèhning wonten dandan (rénovasi) Binnenhof, pasamuan ageng puniká dipunleksanaaken ing Paleis Kneuterdijk (Kraton Kneuterdijk), boten saget ing Binnenhof, presisipun ing Volle Raadzaal bangsal angengipun Raad van State kados biasanipun. Kanggé mrèngeti wekdal puniká Putri Oranje dipunaturi déning Daad van State karsá nanem wit koningslinde (Tilia europaea) ing taman Prancis, Kraton Kneuterdijk.