DEN HAAG – Ramadan puniká ujian, dados sangsáyá bentèr sangsáyá saé, makaten Emna Boukottaya (41). Menawi Ramadan dhawah ing mongsá bentèr (summer), kejawi bentèr ugi dangunipun siyam saget ngantos 21 jam.
Wonten ing negari minoritas muslim kados Walandi, sasi Ramadan sáhá tradisinipun tansah dados pawartos, kados dipunaturaken ing Trouw déning Emna Boukottaya, priyantun Arab Tunisia, satunggaling negari tanggi sisih wétanipun Marokko.
“Kulá nggih ngelak lan lémpoh. Dinten puniká rekásá sanget. Kulá sakeluargi taksih badhé wangsul dateng Tunisia, lan kulá taksih ngepak-ngepak barang. Dadosipun kulá ugi boten saget tilem nglanther, amargi terus menggalih pripun caranipun ngepaki barang-barang wau. Lajeng tengah dalu taksih kedah wungu kanggé sahur.
Naliká siyam Ramadan makaten: sangsáyá bentèr, sangsáyá saé. Sabab ndamel kitá langkung kiat. Kitá kedah ngraosaken siyam, menawi boten makaten nggih boten pikantuk paedah. Sangsáyá awrat siyam, sangsáyá ageng piwales ganjaranipun.
Piwales punápá? nDamel kitá tambah sabar. Gesang ing donyá kadhang kálá pikantuk kasisahan lan kadhang kálá nggih kanikmatan, sarwá gampil. Ramadan puniká ujian kanggé ingkang badhé dipunadhepi mbénjing. Sasi puniká sasi kanggé dipunnikmati, ngraos syukur. Kulá taksih saget ambegan, saget ningali, saget ngendikan, saget gemujeng. Perkawis-perkawis ingkang ndamel kulá langkung sadhar.
Kulá mangertos wonten párá dokter ingkang ngendiká bilih kitá ing wanci bentèr puniká kedah ngunjuk toyá kathah-kathah. Nanging kulá boten pati pitados nemen-nemen. Kulá sampun gadhah dokter piyambak: Nabi SAW. Piyambakipun dhawuh bilih siyam sedinten mawon saé kanggé sirá.”
“Lha puniká siyam sesasi kados pundi saénipun cobi?” makaten Emna Boukottaya.
