LONDON – Ratu Elizabeth II (96) mprèngeti jumenenganipun ingkang kaping 70 mawi ngunjuk tèh sareng beruang Paddington. Videonipun pikantuk èwonan like.
Gusti Kanjeng Ratu nampi beruang Paddington ing Kastil Windsor lan maringi pirsá isi tas piyambakipun. Foto lan video Ratu sareng Paddington wau lajeng dados headline serat kabar-serat kabar Inggris.
“Matur nuwun sampun karsá nampi kulá, mugi-mugi panjenengan pikantuk ambal warsá jumenengan ingkang berkah,” makaten Paddington matur dumateng Ratu.
Kados Pundi Dipuntampi Ratu?
Sowan necis ngadhep Gusti Kanjeng Ratu mawi unggah-ungguh kraton ndadosaken Paddington malah gugup boten kinten-kinten.
“Tèh?“ Ratu ngaturi, lajeng Paddington ngunjuk tèh langsung saking téko. Mirsani kados makaten Gusti Kanjeng Ratu kaget gumun.
Paddington sadar mesthinipun Ratu rumiyin, lajeng nuangaken tèh kanggé Ratu nanging keplèset mencèt dhaharan, cipratanipun kènging abdi dalem. Paddington nyuwun pangapunten.
“Boten nápá-nápá,” dhawuh Ratu.
“Kadosipun panjenengan karsá sandwich nganggé marmelade? Kulá tansah mbetá satunggal mbok menawi sawekdal-wekdal mbetahaken,” makaten Paddington, sinambi mundhut roti saking capingipun.
Jebul Ratu inggih makaten ugi. “Kulá tansah nyimpen kagunganipun kulá ing mriki, kanggé mangké,” ngendiká Ratu, sawetawis piyambakipun mundhut roti saking tas cemengipun ingkang misuwur.
Sawetawis, abdi dalem matur bilih pagelaran badhé dipunwiwiti. Ratu sareng Paddington lajeng nuthuk-nuthuk cangkir tèh ndèrèkaken irama We Will Rock You saking grup Queen.
Remen Damel Humor
Video Ratu Elizabeth sareng Paddington wau dipunsiaraken kálá wingi dalu sadèrèngipun pagelaran ageng ingkang dipunaturaken kanggé párá kawulá ing London.
Ratu piyambak sarèhning ngraos boten sekécá piyambakipun boten saget ngrawuhi pagelaran.
“Nggumunaken sanget bilih piyambakipun, yuswá 96 taun lan sampun jumeneng 70 taun, taksih saget ndamel kaget,” makaten jurnalis BBC, Michael Cowan.
Serat kabar-serat kabar ageng Inggris masang foto ukuran ageng Gusti Kanjeng Ratu Elizabeth sareng Paddington ing kácá utami.
“Sadangunipun kulá gesang kadosipun kulá bakal ningali foto puniká saben dinten,” serat tukang ndagel Tim Vine naliká mirsani Ratu mundhut roti saking tasipun.
Serat kabar-serat kabar wau ugi nyerat bilih video Ratu kaliyan Paddington dipunrekam ing Kastil Windsor lan piyambakipun setengah dinten bingah sumringah sanget.
Sawetawis Kraton Buckingham ngaturaken pirsá bilih ‘kedayohan beruang Paddington naliká Ratu ngunjuk tèh éman sanget menawi boten direkam video.’
Ratu piyambak sampun misuwur menawi remen humor, lajeng karsá paring idin lan wekdal kanggé damel video wau.
Éwodènten Rosie Alison, saking Heyday Films ingkang ndèrèk nggarap proyèk puniká ngendiká dateng The Sunday Telegraph bilih sedáyá tim kesengsem déning humor sáhá sumèhipun Ratu.
“Piyambakipun ugi damel kitá sedáyá sekécá. Kepareng damel video puniká saèstu-èstu satunggaling privilege,” makaten Alison.