AMSTERDAM – Ratu Máxima nampi Presidèn ECB Lagarde ngrembag bebrayan. Taksih wonten 1,7 milyar tiyang dèrèng pikantuk layanan.
Gusti Kanjeng Ratu Máxima ngendikan sareng presidèn Europese Centrale Bank (ECB) Christine Lagarde ing Rijksmuseum Amsterdam, dinten Rebo dalu suryá 8/6/2022.
Kekalihipun ngrembag babagan pambiayaan bebrayan, makaten Rijksvoorlichtingsdienst mawi serat pawartá dateng Het Javaanse Blad.
Gusti Kanjeng Ratu rawuh minongká advokat Sèkjèn PBB bidang pambiayaan bebrayan kanggé pembangunan (UNSGSA).
Gusti Kanjeng Ratu Máxima sáhá Lagarde antawisipun ngendikan babagan CBDC, inggih puniká artá digital saking bank séntral.
Piranti puniká maringi kamungkinan énggal kanggé tetiyang lan perusahaan sáhá mbiyantu pangginaan jásá pambiayaan ingkang sangsáyá digital.
Sanèsipun inggih punikà kaséhatan pambiayaan ing negari-negari majeng lan ngembang sáhá aningkataken tátáleksáná data kanggé mathukaken layanan tumrap kabetahan perusahaan lan tetiyang.
Sapuniká taksih wonten 1,7 milyar tiyang diwásá sajagad dèrèng pikantuk layanan pambiayaan, utaminipun ingkang gajinipun sekedhik, wanitá, lan perusahaan alit.
Gusti Kanjeng Ratu sareng Putri Ariane nembé mawon kundur saking Argentina kanggé mprèngeti sedanipun adik ingkang nami Inés, sekawan taun kapungkur.
Sadangunipun dhahar dalu, ugi rawuh Ngarsá Dalem Rájá Willem-Alexander, Perdana Menteri Mark Rutte Menteri Artábándhá Sigrid Kaag sáhá pangageng sanèsipun.