BOURTANGE – Gusti Kanjeng Ratu Maxima karsá rawuh ing riáyá prajanjian piwulangan musik kanggé sekolah SD ing provinsi Groningen, Friesland lan Drenthe wonten ing panggènan bèntèng Bourtange, dinten Senèn (10/5/2021).
laré-laré pikantuk piwulangan musik wiwit SD
Kaleresan kaliyan kampanye ‘50dagenmuziek’ (50dintenmusik) saking Méér Muziek in de Klas (Langkung Kathah Musik ing Kelas) provinsi-provinsi wau ngaturaken prakarsá énggal sáhá mundhut MuziekAkkoord Groningen-Oost (Prajanjian Musik Groningen Wetan) ing program piwulangan sekolah SD.
Gusti Kanjeng Ratu Maxima piyambak lenggah minongká pangarsá kinurmatan Méér Muziek in de Klas (Langkung Kathah Musik ing Kelas), makaten Rijksvoorlichtingsdienst mawi serat pawartá ingkang dipuntampi Het Javaanse Blad.
Naliká pagelaran musik ing bèntèng Bourtange ingkang ngemu sejarah, Prajanjian Musik Groningen-Wetan dipuntapakastá déning 20 pihak, dipundhèrèkaken kanthi pasugatan musik déning akordeonis Gertie Bruin, sareng siswá-siswá sekolah SD.
94% sekolah-sekolah sampun maringi piwulangan musik kanggé párá siswá SD
Kasilipun, kirang langkung 8000 laré-laré Groningen boten dangu malih bakal pikantuk piwulangan musik tetep ing sekolah, mawi makaryá sareng antawisipun kaliyan Stichting Openbaar Onderwijs Oost Groningen (Yayasan Sekolah Umum Groningen Wétan), Stichting Kunst en Cultuur (Yayasan Seni lan Kabidayan) sáhá Cultuurhuis De Klinker (Griyá Kabudayan Swanten).
Méér Muziek in de Klas (Langkung Kathah Musik ing Kelas) nindakaken kampanye 50 dinten, kaleresan kaliyan dinten tanggap warsá Gusti Kanjeng Ratu Máxima ingkang kaping 50, minongká nyuwun pawigatosan kanggé piwulangan musik ing sekolah SD.
Gusti Kanjeng Ratu Máxima ngrawuhi Bourtange kanggé mirsani kasilipun ing Groningen, Friesland lan Drenthe. Mangké tanggal 16 Mei badhé dipunsiaraken déning stasiun télévisi AVRO/TROS kanthi gambar rawuhipun Ratu sáhá pasugatan musikal párá artis lan laré-laré sekolah SD.
Mirjam Pauwels, punggáwá kutháprájá Assen, ngaturaken babagan makaryá sesarengan ing piwulangan musik salebeting provinsi Drenthe. Sawetawis puniká sampun 94% sekolah-sekolah SD ing provinsi Drenthe sampun maringi piwulangan musik kanggé párá siswá.
Dutá Friesland lan Groningen inggih puniká Oeds Westerhof sáhá Paul de Rook ing ngaturaken babagan makaryá musikal sesarengan ing provinsi Friesland lan Groningen. Satunggaling grup band énggal sekolah SD De Rietzee maringi pasugatan musik kaping sepindhah ing mriku panggènan. Artis Friesland inggih puniká Elske DeWall ngaturaken tembang ‘In Nije Dei’ minongká pungkasan program ing Bourtange. (es/es)
