ROTTERDAM – Gusti Kanjeng Ratu Máxima tilik kriyá dateng A.S. Talmaschool sáhá generale repetitie (gladhi resik) Eurovisie Songfestival ing Rotterdam, dinten Kemis (20/5/2021).
Ratu Máxima tilik A.S. Talmaschool sáhá Eurovisie Songfestival minongká Pangarsá Kinurmatan Yayasan Méér Muziek in de Klas (Langkung Kathah Musik ing Kelas), satunggaling yayasan kanggé majengaken piwulangan seni musik tumrap laré sekolah. Méér Muziek in de Klas ugi mitrá Eurovisie Songfestival taun puniká lan mbetá piwulangan musik dados pusering pawigatosan ing Rotterdam.
Gusti Kanjeng Ratu Máxima ing tengah-tengahing párá siswá antawisipun kanthi interaktif maringi piranti dolanan ingkang saget kanggé damel musik lan dipunginaaken kanggé piwulangan musik. Mawi saráná puniká Méér Muziek in de Klas saget maringi párá siswá wekdal kanggé manggihi dayanipun musik saking piranti wau.
Salajengipun Gusti Kanjeng Ratu Máxima ing A.S. Talmaschool guneman kalih párá guru lan siswá babagan musik, pripun musik ugi saget mbiyantu katrampilan básá párá siswá. Sareng kalihan 46 siswá Gusti Kanjeng Ratu Máxima lajeng tindak dateng gladhi resik semifinal Eurovisie Songfestival ing gedhong Ahoy, Rotterdam. (es/es)
