Gusti Kanjeng Ratu Máxima der Nederlanden kersá rawuh tilik kriyá dhateng SD CBS Sabina van Egmond ten kuthá Oud-Beijerland.
“Pangetrapan protokol keséhatan kanggé nanggulangi virus Corona dipunlaksanaaken kanthi temen sadangunipun Ratu rawuh,” makaten dipunpundhut saking Koninklijkhuis, Senèn (1/3).
Wonten ing sekolahan, Ratu pikantuk katerangan saking párá guru, siswá, lan párá wakil tiyang sepuh siswá babagan kadayan pandemi Corona lan lockdown tumrap sekolah. Ratu ugi kersá mirsani panggènan Sportlaan lan guneman online kalih párá siswá ten Poortwijk.
Lockdown kaping kalih tumrap sekolah dipunlaksanaaken wiwit tanggal 16 Desember 2020 taun wingi. Akibat saking lockdown utawi pewatesan wau saèstu ageng sanget: sekolah kedah maringi piwulang saking tebih malih.
Kejawi makaten ugi wonten raos kuatos perkawis ketilaran pelajaran lan keslametan párá siswá, guru lan pegawai sekolah. Wiwit tanggal 8 Fèbruari 2021 sekolah-sekolah sampun kénging bika malih.
SD CBS Sabina van Egmond ingkang dipun rawuhi Gusti Kanjeng Ratu Máxima puniká sadangunipun lockdown tetep bika khusus kanggé nampi titipan laré-laré ingkang tiyang sepuhipun kagungan kriyá wigatos ingkang boten saget dipun tilar, ugi kanggé laré-laré ingkang boten saget sinau saking tebih. (es)