DEN HAAG – Gusti Kanjeng Ratu Máxima kersá tilik kriyá dateng Nederlands Dans Theater (NDT) ing Den Haag, Salásá (16/3/2021).
Tilik kriyá puniká minongká tetenger tumrap pitakènan pripun pakumpulan tantun saget tetep madeg ing mongsá pagebluk Corona, lan saget nyepengi mutu, program online ingkang merak manah, sáhá ngranggèh publik.
NDT puniká pakumpulan tantun internasional ingkang damel tantun modern saking markasipun ing Den Haag. Pakumpulan puniká cacahipun wonten kalih: NDT 1 kanggé penantun ingkang sampun dugi pucuk karir lan NDT 2 kanggé párá taruná ingkang nggadhahi bakat, sáhá párá profesional anèm.
Nantun ing dalem negari lan ing máncánegari sampun setaun puniká boten saget amargi wonten pagebluk Corona. Akibatipun NDT madosi cárá ènggal supados tetep saget nantun lan saget ngranggèh publik. Ing kahanan puniká rekaman video lan livestreams tari jebul dados pilihan. Pengraosanipun kanggé párá penantun sáhá publik kadosipun pancèn sanès, nanging saget narik publik internasional langkung kathah.
Salajengipun wekdal selá amargi boten siyos nantun dipunginaaken kanggé nindakaken pariksá lan ngupados kanggé saget megar, kreativitas, lan wisik kanggé párá pinantun. Párá koreografer sami dipunaturi rawuh supados saget makaryá nggarap proyèk-proyèk ingkang boten biasa. Ugi wonten lung tinulung kalih organisasi budháyá sanèsipun lan festival.
Gusti Kanjeng Ratu Máxima tilik kriyá ing NDT naliká panyiapen tari énggal ‘Mist (Pedhut)’. Pasugatan pangarep ing Mei 2020 taun wingi boten siyos amargi krisis Corona, nanging mangké Mei 2021 badhé dipunterasaken kanthi virtual.
Gusti Kanjeng Ratu Máxima ngendikan kaliyan párá pedamel NDT babagan pengalaman piyambakipun sedáyá sadangunipun krisis Corona, pripun caranipun ing wekdal sapuniká tetep madeg ing tingkat inggil, saget nyepengi paningal artistik, sáhá saget tetep makaryá.
Direktur énggal NDT ingkang ngastá artistik, Emily Molnar, ndhèrèkaken Gusti Kanjeng Ratu Máxima keliling mirsani satunggaling studio kanggé latihan tantun, bèngkèl dekorasi, lan auditorium, ten pundi tim teknik sáhá tim produksi taksih nggarap dekor ‘Mist”.
Kejawi makaten ugi wonten pawigatosan babagan caranipun livestreaming saget dipundamel, tantangan lan paédahipun lan pripun caranipun párá pedamel NDT wiwit kawitan ngadhepi krisis Corona puniká.
Minongká panutup tilik kriyá, Gusti Kanjeng Ratu pikantuk tetingalan tantun lan ngendikan kalih párá penantun perkawis pengalamanipun manggung tanpá pamirsá, ugi babagan kersá piyambakipun dinten samangké.
Ngarsá Dalem Rájá Willem-Alexander sáhá Gusti Kanjeng Ratu Máxima ugi ngendikan mawi guneman video lan pundi saget kalih sinten kémawon sadangunipun tilik kriyá perkawis akibatipun krisis Corona lan cancut taliwándá sedáyá pihak anggènipun merangi pagebluk. Sadangunipun tilik kriyá, pangetrapan protokol virus Corona dipuntindakaken kanthi temen.
