DEN HAAG – Gusti Kanjeng Ratu Máxima kersá tilik kriyá digital dateng Stichting Kamers met Aandacht (Yayasan Griyá kanthi Gatosan). Yayasan puniká mbiyantu párá laré anèm antawis 18 dugi 23 taun ingkang boten pikantuk bantuan sosial pamrèntah supados saget ajar ngadeg gesang piyambak, makaten Rijksvoorlichtingsdienst mawi press release ingkang dipuntampi Het Javaanse Blad, dinten Kemis (11/3/2021).
Laré-laré anèm menawi sampun pikantuk panggènan kathahipun saget nyuwun bantuan malih kalih kaluargi utawi párá réncangipun. Nanging laré-laré ingkang klambrangan boten gadhah panggènan, ugi boten pikantuk bantuan sosial pamrèntah, artá, utawi boten gadhah ketrampilan, saget nyuwun bantuan Yayasan Kamers met Aandacht supados pikantuk panggènan.
Kanthi cárá makaten, párá laré wau saget ngginaaken tenaganipun kanggé sekolah utawi makaryá tinimbang tansah mumet menggalih mangké dalu badhé tilem ing pundi.
Yayasan Kamers met Aandacht nyambungaken swastá ingkang kersá nyéwaaken griyanipun kanthi regi mirah kanggé laré-laré ingkang kangèlan puniká. Priyantun ingkang nyéwaaken lajeng nemtoaken piyambak gatosan punápá ingkang saget dipunparingaken, upaminipun mbiyantu administrasi utawi kegiatan sosial sanèsipun.
Kejawi makaten, laré-laré anèm wau ugi pikantuk tuntunan profesional déning pegiat sosial ingkang mampir seminggu sepindhah. Kanthi tuntunan ingkang titi nastiti tur aman puniká laré-laré wau saget mbangun gesang bènjing kanthi jejeg.
Yayasan Kamers met Aandacht dipunwiwiti taun 2019 minongká prakarsá tulung-tinulung antawis organisasi-organisasi kanggé laré anèm kaliyan pamrèntah kutháprájá Utrecht kanggé nanggulangi párá laré anèm ingkang lunthang-lanthung.
Yayasan ngurusi, milah-milah, lan nyambungaken kalih pamrèntah kutháprájá, perusahaan griyá, lan organisasi-organisasi kanggé mbangun jejaring dhaérah ingkang jejeg.
Wiwit taun 2020 kutháprájá-kutháprájá sanèsipun ugi saget nggabung. Dinten sapuniká yayasan sampun nggadhahi kantor ing kuthá Utrecht, Den Haag, Hilversum lan taksih dipunwiwiti ing Dordrecht, Leiden lan Amsterdam.
Gusti Kanjeng Ratu Máxima naliká tilik kriyá digital ngendikan kalih párá staf yayasan babagan nggampilaken margi kanggé laré-laré ingkang kangèlan wau. Párá staf ngaturaken katrangan pinten-pinten panggénan ingkang dipunsediaaken, pripun párá laré wau dipungathukaken kalih panggénan ingkang cocok lan pinten kasilipun dugi sapuniká.
Kejawi makaten párá laré wau sáhá párá pihak ingkang nyéwaaken panggénanipun ugi matur dumateng Gusti Kanjeng Ratu babagan pengalamanipun. Párá wakil organisasi, perusahaan griyá, nyariosaken sumbangsihipun dumateng yayasan lan faédahipun kanggé párá laré anèm lan katenteraman gesang ing wilayah mriku.
