DEN HAAG – Regi gas ten Eropa dinten Rebo tembus €160 (Rp 2,6 juta) per MWh. Mindakipun regi gas miturut párá analis amargi distributor nerveus lajeng numpuk cadangan, kuatos menawi regi gas terus mindhak.
“Raos kuwatos nguwaosi pasar,” makaten Ole Hansen saking Saxo Bank tumrap kantor berita Bloomberg kapundhut saking Volkskrant, Rebo dalu (6/10).
Lonjakan regi gas ugi kasebab ekonomi sampun melai kapulihaken sasampunipun krisis Corona, cadangan ingkang kirang nyekapi lan kaleresan Norwegia taksih ngawontenaken pangrumatan tambang-tambang gasipun. Sawetawis puniká Rusia ugi boten kersá malih ngékspor gas kados syarat miturut kontrak.
Minongká akibat mindhakipun regi gas, rekening ènèrgi párá wargi ing Walandi taun ngajeng samangké miturut prakiraan ugi bakal mindhak ngantos atusan Euro. Sinten kagungan kontrak ènèrgi variabel, Januari mangké sampun bakal pikantuk tagihan kathah. Rátá-rátá kaluargi ing Walandi minggu sapuniká sampun kedah nambah 500 Euro (Rp 8.250.000) kanggé kontrak langganan gas setaun, makaten Pricewise, Rebo.
IMF sampun wanti-wanti dinten Selásá bilih regi gas ingkang inggil saget ngadhang-ngadhangi pamulihan ekonomi. Pramilá Parlemèn Eropa kalih párá Menteri Lingkungan Uni Eropa dinten Rebo nggelar rapat kanggé rembugan perkawis puniká.
“Regi gas ingkang inggil ngancem dáyá kongkurènsi (saing) ekonomi Eropa sáhá saráná finansial kaluargi,” makaten Perdana Menteri Ceko Anrej Babiš dumateng párá pemimpin Eropa.