DEN HAAG – Cacahipun wonten 192.401 tawon ing tanah Walandi, makaten kasilipun Nationale Bijentelling 2021 (Pangétangan Tawon Nasional 2021). Ongká puniká minongká sampel saking wargi ingkang ndhèrèk pangétangan.
Kathahipun wonten 10.556 wargi ndhèrèk pangétangan taun kaping sekawan puniká. Cacah 192.401 wau taksih saget nambah malih, sarèhning wargi dugi dinten Senèn dalu taksih saget ngaturaken formulir étangan. Taun kapengker cacahipun tawon kaserat wonten 130.000, wargi ingkang ndhèrèk pangétangan wonten 10.000.
“Bilih wonten èwonan wargi ingkang ndhèrèk malih ing pangétangan puniká dados pawartos saé kanggé tawon palasan,” ngendiká Koos Biesmeijer, ahli tawon saking Naturalis.
Miturut Biesmeijer, pangétangan tawon ing taman párá wargi puniká minongká sumbangsih kanggé panelitian tawon palasan ing Walandi. Sumbangsih wau saget maringi paningalan upaminipun ing cacahipun tawon antawis wilayah, lan bèntenipun antawis dhusun kalih kuthá.
Salajengipun ing tanah Walandi wonten 358 jinis tawon, antawisipun tawon madu, ingkang sapuniká kaancam sirná. Kahanan puniká miturut párá ilmuwan mprihatinaken sanget, amargi 80% tetuwuhan pangan ing tanah Walandi gumantung kalih tawon lan sabrayatipun. Ancaman paling ageng nggih puniká kirangipun sekar minongká sumber pakan lan susuh kanggé manggèn.
Katerangan puniká taksih kedah dipuntelaah langkung teliti malih, nanging Biesmeijer boten pati pitados bilih tawon-tawon ing wilayah kuthá sangsáyá kirang.
“Taun-taun kapengker tawon dipunwigatosaken sanget. Boten namung pamréntah kutháprájá sampun ngowahi pranatan, nanging ugi kathah wargi ingkang kagungan pakebonan sampun maringi pawigatosan dateng pakebonan ingkang alami sáhá kathah tawon. Pakebonan ingkang langkung sakedhik beton semèn, langkung kathah tetuwuhan lan sekar, langkung ngundang kathah tawon,” makaten Biesmeijer.
Sadèrèngipun párá ahli sampun kuwatos bilih háwá adhem ing sasi April, ingkang biasanipun sampun anget, bakal nggadhahi pangaruh tumrap cacahipun tawon. Nanging kasunyatanipun jebul boten makaten, per wilayah cacahipun tawon malah langkung kathah.
“Nggumunaken bilih kathahipun ratu tawon tahan háwá adhem ing wiwitan sasi April,” makaten Vincent Kalkman, ahli tawon madu ugi saking Naturalis.