DEN HAAG – Rokok ing Tanah Walandi badhé dipunundhakaken reginipun déning kabinèt dados € 40 (Rp 620.440) sawungkus, dhemi generasi bèbas rokok.
Kirang langkung 20% kawulá Walandi wekdal sapuniká taksih udud. Ing taun 2040 mangké ongká wau kedah sangsáyá kirang lan perkawis regi wigatos sanget kanggé ngerèm tiyang udud, makaten kabinèt.
“Pamréntah ngarsaaken prosentasé wau saget mandhap dugi 5%, pramilá kitá sapuniká nyiapaken pranatan énggal. Paling èfèktif nggih pranatan regi, kados kitá pirsani ing Australia,” makaten sumber kabinèt.
satá = mbako
krámá inggil: satá, ngoko: mbako
Ing mriká, Australia, sapuniká regi bahan udud saking satá puniká rátá-rátá € 25 (Rp 387.500) sawungkus. Ing Tanah Walandi regi € 40 sawungkus dados skenario ingkang dipunpenggalih déning kabinet.
Pitakènanipun inggih puniká punápá beleid énggal puniká mangké bakal pikantuk dukungan politik mayoritas menawi reginipun dados awis sanget kanggé párá kawulá. Regi rokok ing Walandi sapuniká kirang langkung € 8 (Rp 124.000) sawungkus.
Data Trimbos
Kawulá ing Walandi ingkang udud miturut data Trimbos tahun 2021 kapungkur cacahipun wonten 20,6% kawiwitan saking yuswá 18 taun, mandhap 5,1% tinimbang taun 2014 ingkang kaserat wonten 25,7%.
Kirang langkung 3/4 saking párá kawulá ingkang udud wau udud saben dinten (15,2% saking kawulá umum), 2,7% udud ndakik saben dinten rátá-rátá >20 lencer. Lajeng kawulá ingkang pendidikanipun inggil langkung sekedhik ingkang udud tinimbang pendidikan tengahan lan andhap.
Ing taun 2021 cacahipun 30,9% saking kawulá ingkang udud wau naté nyobi kanthi temen supados mandheg udud (boten udud langkung dangu saking 24 jam). Kathahipun kawulá ingkang udud wau mbetahaken wekdal sadèrèngipun saget mandheg saèstu, amargi sampun kadhung nyandu.
Udud Pasif
Cacahipun 11% kawulá Walandi ingkang boten udud taksih asring kénging pegá rokok sadangunipun taun 2020. Malah 5% kapeksan udud pasif saben dinten.
Udud pasif boten saé kanggé keséhatan. Tiyang-tiyang ingkang udud pasif saget pikantuk penyakit ingkang sami kados ingkang udud aktif. Utaminipun kanggé laré-laré alit udud pasif wau boten séhat. Laré-laré wau langkung énggal pikantuk masalah paru-paru utawi infeksi talingan. (es/es)