Sampun dangu anggèn kulá kangen dhateng gebyagipun ringgit tiyang, dumadakan kulá mireng bilih amarengi tingalan dalem tumbuk Gusti Bandara Kanjeng Raden Ayu Mangkunagárá ing dalem Mangkunagaran badhé anggebyagaken ringgit tiyang, menggah kalampahanipun badhé wonten malem Akat Pon.
Kusung-kusung kaliyan sadhèrèkan kulá tiyang nenem sasarengan mangkat saking dhusun. Jam pitu sonten kulá dumugi ing pamedan Mangkunagaran, ing riku titiyang ingkang sami ningali sampun andher.
Sansáyá sareng kulá dumugi ing palataran titiyang sami jejel uyelan toblas par jalanthir angggènipun sregep angrabèkaken sikut dhasar kathah párá arum dalu amiyosi: mangarsá-arsá kinedhepáná karoningsih pasang rakiting pandhápá kawistárá, bilih badhé anampèni rawuhipun tamu luhur.
Sareng kendel jam sángá mungel salomprèt tengar, puniká mebahing párá kawulá binarung umyungipun sawaraning tiyang. Angyaktosaken pamethèk kulá wau, boten dangu titiyan dalem sang prabu anèm dumugi ing topenganing pandhápá, Kanjeng Gusti Pangèran Adipati Arya Prabu Prangwadáná tumedhak saking pandhápá, ginarebeg párá sadhèrèk dalem ingkang pepak sami sowan sadáyá.
Amethukaken rawuh dalem sang prabu anèm rawuh dalem wau sarimbitan ingkang garwá Gusti Kanjeng Ratu, sáhá kadhèrèkaken Gusti Kanjeng Pangèran sadhèrèk dalem tuwin Kanjeng Pangèran santáná sawatawis rawuh dalem sang prabu anèm wau lan ingkang garwá sami anjujug ing dalem.
Boten dangu nunten amiyos ing paringgitan ingkang garwá katilar lenggah ing paringgitan, sang prabu anèm lengggah ing pandhápá. Sasampunipun atátá lenggah nunten sugatá wédang sumaos lumèngsèripun sugatá wédang nunten miwiti gebyagipun ringgit tiyang, menggah lampahanipun Irawan Bagná. Sadáyá ingkang kulá tingali boten wonten ingkang anguciwani, bibaripun wanci jam tigá dalu, kulá lajeng mantuk boten angentosi kundur dalem sang prabu anèm.
Anjaliretná kaping 21 Jumadilakir angkaning warsá tinengeran sinembah sembah sarirá gusti
Kyai Subálaksáná (Kapethik saking: KITLV Leiden)