SURABAYA – Sampoerna Theater bioskop paling ageng jaman semanten ing Hindia Walandi dipunresmiaken malem Ngahad (29/7/1933).
Paresmèn dipunrawuhi kathah tamu undangan mawi muter film kaping sepindhah ing gedhong énggal Sampoerna Theater puniká.
Bioskop Sampoerna Theater puniká anak usaha N.V. Handelmaatschappij Sampoerna, produsèn rokok Djie Sam Soe, kagunganipun Liem Seeng Tee, ugi dirèktur.
Kejawi Djie Sam Soe, wekdal semanten jaman Walandi rokok damelan N.V. Handelmaatschappij Sampoerna ingkang kondhang inggih puniká merk Dapoean.
Arsitèk Job & Sprey
Bioskop puniká senaosá kursinipun ageng nganggé let longgar, nanging saget kamot 1.200 penonton lan menawi perlu saget ngantos 1.600 penonton.
Wiyaripun 40m x 22m, langkung ageng saking gedhong Stadstuin ing kuthá Uwent, makaten kapethik saking Algemeen Handelsblad voor Nederlands-Indië (1/8/1933).
Ingkang nggarap gedhong Sampoerna Theater inggih puniká kantor arsitèk Job & Sprey, lajeng konstruksi wesinipun dèning N.V. de Ned. Ind. Industrie.
Kori mlebetipun langkung wiyar tinimbang bioskop sanèsipun, kiwá tengenipun wonten lokèt, lajeng layar bioskop ingkang ngajengipun wonten panggung kanggé orkès.
Sarwá Miguná
Ing wingkingipun layar bioskop wonten panggung tonil ingkang saget muter, diamèteripun 9 mèter, ugi paling ageng ing Hindia Walandi.
Naliká ngaso, penonton saget lenggah ing balkon wonten inggil ingkang wiyaripun 22m x 20 meter. Intérioripun simpel nanging necis mathuk kaliyan meubelipun.
Vèntilasinipun saé sanget, lajeng audionipun nganggé piranti Philisonor, damelan Philips, mundhut saking firma Van Wingen.
Pagelaran paresmèn Sampoerna Theater puniká kalebet radi dangu, antawisipun wonten musik lan tonil déning grup pribumi lan Tionghoa, lajeng dipunputer film Kampf urn Blond.
Kolff & Co Tunjungan
Kajawi Sampoerna Theater, kabar sanèsipun dinten malem Ngahad wau inggih puniká paresmèn toko buku énggal N.V. Koninklijke Boekhandel sáhá Drukkerijen G. Kolff & Co ing Tunjungan 70.
Sareng Hellendoorn, usaha énggal kagunganipun Van Wingen lajeng mangké toko Hoffman, bakalipun mriki dados pusering tetokoan ingkang setaun kapungkur taksih satunggal kalih gedhong mawon.
Kathah wargi Surábáyá rawuh ngaturaken wilujeng dumateng tuan Roffing, pangarsá Surábáyá, wargi sanèsipun ngintun sekar, ingkang ndadosaken swasáná pista sangsáyá sumringah.