UTRECHT – Sanaosá pamréntah sampun nglonggaraken lockdown, nanging kathah sekolah ing Walandi dèrèng wantun bika malih.
kulá dèrèng pikantuk vaksin, boten wantun mulang kelas
Bram Donkers
Sekolah lajengan utawi tengahan (SMP/SMA) taksih bingung punápá badhé bika piwulangan adhep-adhepan malih. Ugi ing wilayah Utrecht, jebul kathah sekolah ingkang dèrèng wantun mbika kori malih kanggé párá siswanipun. Sekolah-sekolah wau taksih mbetahaken wekdal.
Saking 15 sekolah lajengan yayasan NUOVO kathahipun dèrèng wantun mbika kori malih kanggé párá siswanipun, makaten juruwicárá Bram Donkers kapethik saking Gelderlander dinten Setu (29/5/2021).
“Minggu ngajeng kitá kanthi ngatos-atos nembé badhé mbika sekolah, supados tanggal wajib bika sekolah malih 7 juni mangké párá siswá saget mlebet sekolah,” ngendiká Bram Donkers.
kathah guru utawi kaluarginipun ingkang kalebet kelompok risiko
Eric Hordijk
Sadèrèngipun minggu kapengker pamréntah sampun netepaken bilih wiwit tanggal 31 Mei mangké párá siswá saget mlebet sekolah malih tur boten usah njagi let, nanging tetep kedah njagi let 1,5 meter tumrap párá guru. Tegesipun, párá siswá bakal ing wekdal akhir sekolah puniká badhé kebak malih ngisi kelas. Mélai 7 Juni sedáyá sekolah wajib bika malih.
“Nanging boten gampil kados niku,” ngendiká Bram Donkers.
Kejawi masalah logistik, ugi kathah guru ingkang kagungan pitakènan kuwatos pripun mangké naliká mulang ngadhepi kelas ingkang kebak siswá.
Sebagéan guru ngendiká “kulá dèrèng pikantuk vaksin, kulá boten wantun mulang kelas ingkang kebak siswá.” Kahananipun boten simpel sarèhning Outbreak Management Team/OMT (Tim Pangurusing Wabah, red) ugi maringi dhawuh supados párá siswá lan guru nindakaken tès per minggu kaping kalih.
“Kitá boten gadhah pitanti tès lan boten gadhah tenaganipun. Kitá sareng párá siswá puber kedah ngatasi piyambak. Sapuniká kita dhawuh tumrap siswá, “Monggo iki tès mandiri, gawanen bali, lakoni tès dhéwé nang omah bareng bapak ibumu.” Pitakénan pentingipun: sinten saget njamin manawi párá siswá ing griyá nindakaken tès saèstu?” makaten Bram Donkers.
Salah satunggaling saking sakedhik sekolah ingkang wantun bika malih minggu ngajeng inggih puniká Leidsche Rijn College, Leiden.
“Kitá badhé bika malih dinten Selásá. Sarèhning 300 siswá ingkang badhé ujian mangké nglampahi ujianipun ing gedhong Jaarbeurs, pramilá kitá saget longgar sanget. Ugi kitá gadhah 6 ruang olahraga kanggé kelas, tur vantilasinipun saé. Kitá saget nglajengaken piwulangan malih kados sadèrèngipun lockdown, lan ngaosaken saget nyambut párá siswá malih ingkang cacahipun 1.400,” ngendiká Kepala Sekolah Leidsche Rijn College, Eric Hordijk.
Miturut Hordijk párá guru ugi deg-degan. Piyambakipun ugi gadhah guru-guru utawi kaluarginipun ingkang ringkih kalebet kelompok risiko tumrap virus Corona.
“Kanggé guru-guru puniká kitá sampun maringi pilihan, antawisipun siswá pikèt ingkang mbiyantu guru nyetèlaken piranti komputer, lajeng mbimbing réncangipun, ugi wonten lokal kelas ingkang langkung wiyar supados guru ngraos sekécá. Makaten kitá maringi párá guru raos aman,” makaten Eric Hordijk. (es/es)