DEN HAAG – Sinten kuliná dhahar séhat langkung enèm kognisinipun. Langkung tambah yuswá, langkung ageng bèntenipun antawis ingkang dhahar séhat kalawan ingkang boten.
Ugi priyantun-priyantun ingkang dhahar séhat munduripun fungsi kognitif langkung alon utawi langkung dangu tinimbang priyantun ingkang dhaharipun boten séhat, makaten kasilipun panelitian Rijksinstituut voor Volksgezondheid en Milieu/RIVM (Lembaga Nasional Kaséhatan lan Lingkungan) tumrap 3.000 priyantun ing kuthá Doetinchem ingkang dipunteliti 20 taun dangunipun.
Sampun kathah panelitian mbuktiaken kaitanipun antawis cárá gesang séhat lan fungsi kognisi mangké menawi sampun sepuh. Studi kohort ingkang dangunipun 25 taun neliti sakumpulan priyantun ugi mbuktiaken hipotesis bilih dhahar séhat saé kanggé organ utek.
kathah sayuran lan woh-wohan, wiji-wijian, ngéndhani lemak jenuh, ngirangi dhahar olahan, sakedhik sarem lan gendhis
Punápá párá rèspondèn nggadhahi pola dhahar Mediteran, 4 séhat 5 sampurná, utawi ndhèrèkaken pitedhahipun WHO, pokokipun sinten dhahar séhat skoripun langkung saé tinimbang réncangipun sayuswá ingkang nggadhahi pola dhahar boten séhat.
Pramilá panjenengan boten usah pindhah gesang ing wilayah Mediteran utawi ndhèrèkaken pola dhahar utawi diet Mediteran, sebab dhahar séhat umumipun nggadhahi paugeran ingkang sami mawon: kathah sayuran lan woh-wohan, wiji-wijian, ngéndhani lemak jenuh, ngirangi dhahar olahan, sakedhik daging abrit, sakedhik sarem lan gendhis.
Boten namung fungsi pangéling-éling (memori), ugi kaluwesan lan kacepetan anggènipun utek ngolah informasi ugi dipuntès. Salajengipun párá rèspondèn dipuntakèni punápá kagungan penyakit, dipunukur lan dipuntimbang, lajeng ngisi daftar piktakènan babagan dhaharipun.
Priyantun-priyantun ingkang pendidikanipun inggil, ingkang gesang aktif, boten kathah ngrokok, lan boten kagendhutan, umumipun ugi dhaharipun langkung séhat. Sanaosá makaten kaitan antawis pangan lan kognisi tetep madeg, sasampunipun tim paneliti nyaring faktor-faktor sanèsipun. Priyantun ingkang dhahar séhat kanthi mbetá risiko genetis tumrap Alzheimer, langkung kathah pikantuk manfaat tinimbang priyantun rátá-rátá.
“Bilih dhahar séhat wigatos sanget kanggé nyegah penyakit jantung, pembuluh darah lan diabetes tipe 2, masyarakat kathahipun sampun pirsá, nanging ingkang radi dèrèng pirsá inggih puniká dhahar séhat saget nyegah kamunduran kognisi, sáhá ngirangi risiko pikantuk kapikunan,” makaten Monique Verschuren ingkang ndhèrèk tim panelitian puniká.
Ugi Prof. Jaap Seidell, Guru Besar Pangan & Kaséhatan Vrije Universiteit Amsterdam sarujuk bilih puniká wanti-wanti ingkang paling wigatos saking panelitian puniká. Piyambakipun boten ndhèrèk panelitian, nanging dados salah satunggaling ingkang mprakarsai panelitian wau.
“Wigatos sanget kanggé wanti-wanti bilih paugeran dhahar séhat boten namung kanggé nyegah masalah kaséhatan, nanging bilih cárá gesang ingkang séhat kanggé jángká wekdal dangu ugi nggadhahi pangaruh,” makaten Prof. Seidell. (es/es)