DEN HAAG – Nindakaken dhawuh Openbaar Ministerie (Kajeksan), pulisi nutup 2 kanal guneman aplikasi Telegram inggih puniká kanal Bataafse Republiek lan Bataafs Nieuws, sarèhning kanal wau dipunginaaken kanggé ngojok-ngojoki nglawan pamongprájá.
Kakalih kanal guneman puniká sampun dangu mlebet pamriksan pidana, makaten Kajeksan ngumumaken kados kapethik saking Algemeen Dagblad dinten Senèn (11/2).
Wiwit sasi Mei kapungkur sampun wonten pinten-pinten kadakwá ing grup wau sarèhning piyambakipun mbabaraken posting ingkang ngancem, ngojok-ngojoki lan mbagi link kanal sanèsipun ingkang ngandhut isi nerak hukum. Kanal wau nalika dipuntutup nggadhahi anggota langkung saking 13.000.
Antawisipun kadakwá panyebar teori konspirasi saking kanal wau inggih puniká Joost Knevel, Micha Kat lan Wouter Raatgever mbabaraken informasi Red Pill Journal, ing mriku antawisipun piyambakipun ngancem direktur RIVM Jaap van Dissel.
Miturut Knevel, Kat, lan Raatgever, direktur RIVM Dissel ndhèrèk rájápati mejahi laré alit ing kuthá Bodegraven. Sapuniká Knevel, Kat, lan Raatgever sampun dipuncepeng pulisi lajeng mlebet tahanan. Raatgever dipuncepeng ing kuthá Siddeburen, sasi Juni kapungkur.
Knevel dipuncepeng ing Spanyol, sapuniká sampun dipunserahaken dateng pulisi Walandi. Éwodènten Kat kacepeng ing Belfast, Irlandia Lèr. Dinten Jemuah samangké wonten sidang pangadilan ing mriká perkawis panyerahan piyambakipun dateng Walandi.
Wonten ing kanal-kanal wau ugi dipunandumaken informasi privat saking párá priyantun ingkang ndhèrèk kampanye vaksinasi kanggé nanggulangi virus Corona. Kajawi makaten admin kanal wau ugi nyebaraken teori konspirasi babagan jejaring pedofil lan upácárá mejahi laré-laré alit.
Minggu kapungkur wonten wárá-wárá bilih ing kanal wau badhé dipunpasang video énggal ingkang ngandhut isi ngancem, fitnah, lan ngojok-ngojoki nglawan pamréntah. Perkawis video wau pangadilan ing Den Haag sampun maringi vonis bilih video wau ngandhut isi ingkang nerak hukum, saénggá kedah dipunbusek saking internet, lan boten kénging dipunpasang malih.
Kajeksan pirsá bilih ing grup Bataafse Republiek lan Bataafse Nieuws wonten réklame kanggé kanal énggal, lajeng dhawuh dateng pulisi supados nutup kanal wau, sadèrèngipun ‘párá anggotá saget mirsani isinipun ingkang nerak hukum’. Kanal énggal wau sapuniká sampun dipunbusek déning admin piyambak.