Suriname wiwitan vaksinasi Corona kanggé warginipun. Pikantuk giliran kaping sepindhah nggih puniká párá staf medis.
“Paleksanan vaksinasi puniká mundhut panggenan ten Academisch Ziekenhuis (Griyá Sakit Akademis, red), Paramaribo,” makaten Kamentrian Keséhatan Suriname, Selásá (23/2).
Kanggé wiwitan vaksinasi puniká Suriname pikantuk 1.000 dosis vaksin AstraZeneca, minongká bantuan saking negari Barbados, namung cekap kanggé 500 staf medis.
Dèrèng pati cethá kapan Suriname badhé pikantuk vaksin salajengipun. Suriname mbetahaken 800.000 vaksin kanggé 400.000 warginipun.
Supados saget mundhut vaksin wau, Suriname minggu wingi lajeng ndamel COVID-19 Vaccin Fonds Suriname/CVFS (Bándhá Vaksin Covid-19 Suriname, red), kanthi tujuan ngempalaken artá saking perusahaan lan instansi sanèsipun kanggé mundhut vaksin.
Pemerintah Suriname piyambak sampun mesthèkaken sebagian vaksin ingkang dipunbetahaken wau kanthi maringi panjer dumateng leveransir, nanging taksih dèrèng cekap.
Sawetawis jumlah wargi ingkang positif tès Corona sangsáyá kirang. Dinten Senèn wingi namung 1 wargi ingkang positif tès Corona.
Ten Suriname wiwit awal wabah wonten sakirang-kirangipun 9.000 wargi ingkang positif Covid-19. Sapuniká taksih wonten 23 wargi dipunrawat ten Griyá Sakit, antawisipun 6 wargi ten intensive care.
Amargi ongká pasièn sangsáyá mandhap, pramila minggu puniká sedáyá sekolah kénging bika malih. Ingkang sekolah dhasar (SD) sampun bika munggu kálá wingi.