Tetuwuhan ten Den Haag sangsáyá wigatos kanggé kuthá. Wonten ingkang dipun tanem wiwit jaman Rájá Karel V taun 1536.
Kuthá Den Haag ten taun-taun ngajeng kedah langkung ijem, ijo royo-royo. Pramilá pamréntah kutháprájá badhé nanem langkung kathah tetuwuhan kanggé mujudaken program puniká.
Kejawi makaten, pamréntah ugi bakal andum winih tetuwuhan wau gratis dumateng párá wargi Den Haag kersanipun saget dipuntanem ten kebon utawi pekaranganipun piyambak-piyambak. Program puniká kaserat wonten ing nota ingkang dipunwastani: Nota Tetuwuhan pamréntah kutháprájá Den Haag.
“Tetuwuhan sangsáyá wigatos kanggé kuthá, utaminipun naliká kuthá sangsáyá pepek kathah manungsá,” ngendiká Leendert Koudstaal, ingkang sampun 42 taun mikul tugas ngrawat atusan èwon tetuwuhan kagunganipun pamréntah, antawisipun 120.000 tetuwuhan ten tengah-tengahing kuthá.
Contonipun tetuwuhan ten margi Lange Voorhout, ingkang ten mriku wonten hotel misuwur: Hotel Des Indes, kathah jèjèr tetuwuhan ageng merbawani. Sebagian tetuwuhan wau yuswanipun mèh sampun 200 taun.
“Ingkang puniká sampun sepuh saèstu, pramilá kitá bangga sanget,” celathu Koudstaal ten Algemeen Dagblad (22/2) sinambi nedhahaken jèjèran tetuwuhan ingkang pancèn cethá ketingal sampun sepuh sanget.
Miturut seratan, tetuwuhan ten sisih kiwá tengen margi Lange Voorhout wau wiwitan kaping sepindhah dipuntanem kanthi dhawuhipun Ngarsá Dalem Rájá Karel V ten taun 1536 supados párá wanitá wekdal semanten saget mlampah-mlampah ten mriku lan párá sudagar ulam saget ngiyup saking bentèripun srengèngè. Saking wigatosipun tetuwuhan wau sinten ingkang ngrisak pikantuk hukuman dipunkethok astanipun.
Koudstaal nambahaken bilih tetuwuhan dugi dinten sapuniká tansah wigatos kanggé kuthá Den Haag, boten namung ndadosaken kuthá tambah éndah lan asri, nadhahi CO2 lan dados sumber O2, nanging ugi maringi katedhuhan kanggé ngiyup wancinipun mángsá bentèr.
Den Haag ugi kuthá paling sepindhah ten Eropa ingkang nanem tetuwuhan ten nginggil gedhong parkiran Het Plein. Ten taun 2030 samangké kuthá Den Haag dipunarepaken saget nambah langkung kathah godhong 5% malih. Sangsáyá kathah godhong, sangsáyá kathah sumbangsih tetuwuhan wau tumrap kwalitas gesang.
Miturut pejabat kutháprájá Hilbert Bredemeijer, kuthá Den Haag bakal dados kuthá pelopor ten Walandi ingkang badhé ngukur jumlah volume godhong saking sedáyá tetuwuhanipun. Kuthá-kuthá kados New York lan London sampun miwiti ngetrapaken program kados makaten.