JOGJA – Saben taun, Kraton Ngayogyakarta mprèngeti Tingalan Jumenengan Ngarsá Dalem Sri Sultan Hamengku Buwono X. Prèngetan dipuntindakaken miturut kalènder Jawi saben tanggal 29 Rejeb.
Wonten ing taun 2021 puniká Tingalan Jumenengan Dalem minongká mprèngeti 33 taun Ngarsá Dalem Sri Sultan Hamengku Buwono X jumeneng miturut kalender Jawi 29 Rejeb, Tahun Jimakir 1954, dhawah kaleresan kalih Setu, 13 Maret 2021. Miturut taun Masehi, Ngarsá Dalem jangkep jumeneng 32 taun kálá wingi tanggal 7 Maret 2021.
Kanggé mprèngeti dinten kasebat wau, Kraton Ngayogyakarta ngawontenaken reruntungan upacárá ingkang badhé dipuntindakaken wiwit tanggal 27 Rejeb. Rupi-rupi Hajad Dalem prèngetan Tingalan Jumenengan Dalem puniká makaten:
1. Ngebluk: 27 Rejeb
2. Ngapem: 28 Rejeb
3. Sugengan: 29 Rejeb
4. Labuhan Parangkusumo: 30 Rejeb
5. Labuhan Lawu lan Labuhan Merapi: 1 Ruwah
Amargi wonten pagebluk COVID-19, milá paleksanan sedáyá upacárá wau ngetrapaken piwatesan, boten namung párá punggáwá nanging ugi tatacaranipun. Acárá ugi dipungelar kanthi katutup utawi boten kanggé umum.
Penghageng Kawedanan Hageng Punokawan Parwabudáyá GKR Mangkubumi ngendiká bilih senaosá upacárá kedah dipuncocogaken kalih kahanan sapuniká, nanging tegesipun lan jiwanipun boten ical.
Upacárá adat ingkang sampun kalampahan atusan taun dangunipun badhé tetep mlampah kados punápá mesthinipun. Wontenipun katemtuan puniká minongká wujud jejegipun Kraton Yogyakartá nglampahi tradisi ing kahanan punápá kémawon.
“Kados pelaksanan prèngetan Tingalan Jumenengan Dalem taun wingi, wekdal semanten pagebluk sampun wonten. Naliká semanten, pelaksanan Labuhan Lawu ingkang biasanipun dugi Hargo Dalem, dipuncocogaken namung dugi Cemoro Kandang. Senaosá makaten, ubárampè ingkang dipunsiyapaken sartá palaksananipun tetep sami. Taun sapuniká, rupi-rupi panyocokan tetep dipuntindakaken. Acárá ing njawi Hajad Dalem kados pamèran sáhá simposium ugi badhé dipuncocokaken,” makaten Gusti Mangku.
GKR Mangkubumi salajengipun ngendiká bilih prèngetan Tingalan Jumenengan Dalem Ngarsá Dalem Sri Sultan Hamengku Buwono X dipunmaknai boten namung minongká tambahipun wekdal jumenengan nanging ugi minongká tetenger bilih jaman sampun kathah owah.
Miturut GKR Mangkubumi, sadangunipun Ngarsá Dalem Sri Sultan Hamengku Buwono X jumeneng, kraton tansah ngupados kanggé saget nututi megar owahing jaman.
“Teknologi tansah megar, lan keraton migunaaken kanggé siyar budháyá ingkang langkung jembar. Bándhá budháyá kraton arupi barang utawi sanès barang dipundokumèntasiaken supados párá wargi saget mirsani, nyinaoni, lajeng ndèrèk nguri-uri. Babagan puniká temtu mbetahaken pitulungan saking sinten kèmawon, kalebet ing mriki párá Abdi Dalem ingkang ndarbèni keahlian nanging tetep mikul dhuwur adat sáhá budhi pakerti,” Gusti Mangku paring katrangan.
Kejawi makaten Gusti Mangku ugi ngarepaken kanthi sangsáyá tambahipun wekdal jumeneng Ngarsá Dalem, sangsáyá kathah berkah ingkang ngambrah-ambrah kanggé Kraton Ngayogyákartá.
“Minongká panuntun, temtu kitá sedáyá ngarepaken Ngarsá Dalem tansah dipunparingi keséhatan supados tansah saget dados ingkang Hamengku (ngreksá), Hamangku (ngutamiaken rakyat, langkung kathah maringi tinimbang nampi), sáhá Hamengkoni (ngiyataken). Mugi-mugi berkah ugi tansah ndèrèkaken Ngarsá Dalem anggènipun nuntun kraton, keluargi, lan párá wargi Ngayogyákartá kalih sedáyá kaprananipun,” makaten Gusti Mangku.