DEN HAAG – Dinten Senèn ketingalipun Mark Rutte boten saget dados Perdana Menteri malih, nanging dinten Selàsà kahanan owah.
Rutte pikantuk sokongan saking verkenner (priyantun ingkang kadhapuk tugas njajagi pambentukan kabinet, red) Herman Tjeenk Willink. Miturut Willink, Rutte boten dados ganjelan pambentukan kabinet énggal.
Rutte kécalan sokongan politik sasampunipun kadadosan insidèn bocoripun memo rembugan pambentukan kabinet. Wekdal semanten Mendagri demisioner Kajsa Ollongren ingkang positif ketularan virus Corona, kesesá nilarakan rapat, lajeng ngastá berkas ingkang boten katutup. Mawi kamera kandhutan berkas wau ketingal. Pokok-pokok kandhutan rapat dados bocor.
Dinten sapuniká kahanan politik tumrap Rutte kadosipun sampun pulih malih. Herman Tjeenk Willink negesaken bilih tugas saking Tweede Kamer (parlemèn Walandi, red) boten kanggé milih person, nanging partai. Partai pimpinan Mark Rutte, VVD, ingkang menang pemilu kagungan hak mbentuk kabinet.
“Panjenengan boten kénging mbiji priyantun ingkang sampun sedásá taun dados Perdana Menteri minongká boten kagungan kautaman,” makaten Willink.
