EPE – Ampun sembarangan menawi kabelet turas ing Walandi, langkung aman madosi pom bensin. Turas sembarangan mbebayani, kados dipunalami déning André Struijk (80).
Kulá menggalih: mati aku!
André Struijk
Pungkasan minggon kálá wingi André Struijk dipunsruduk cèlèng naliká kabelet turas ing pinggir tetuwuhan Tongeren. Kasilipun tatu suwèk 30 cm lan 60 jahitan ing bagéan pupu samparanipun.
“Kulá menggalih: mati aku!” makaten André dateng Algemeen Dagblad dinten Rebo (5/5/2021)
Miturut André, piyambakipun boten kaget ngadhepi kacilakan ngantos tatu, nanging ingkang puniká nggegirisi sanget. Saben piyambakipun merem nutup socanipun, taksih tansah kebayang cèlèng wau nyruduk nyerang piyambakipun.
Makaten wau kedadosanipun dinten Setu kirang langkung jam setengah enem naliká piyambakipun mlampah-mlampah sonten, kados dipuncariyosaken makaten:
“Kulá kathah mlampah-mlampah tur dangu, muter tebihipun 10 kilometer kanthi njangkah kebat, dangunipun saget ngantos 2 jam, dados ing tengahing mlampah-mlampah kulá kadhang kebelet turas.
turas (krámá inggil), pipis, nguyuh (ngoko)
Lajeng kulá turas ing margi setapak ing Tongeren. Boten persis ing margi setapak wau, sabab puniká asosial boten sopan. Kulá radi mlebet ing tetuwuhan kirang langkung 5 meter. Ujug-ujug kulá sampun adhep-adhepan kaliyan cèlèng jaler ageng, ingkang kalem nyedhaki kulá.
Sarèhning cèlèng wau ketingal kalem, kulá boten kami gilan. Kulá ugi mbalik kalem badhé nuju margi setapak malih, nanging jebul tumindak kulá wau lepat. Sabab sakelebat kulá sampun nggléthak ing siti dipunsruduk, congor cèlèng sampun ngadhep pasuryan kulá. Kadadosanipun cepet sanget, kulá sampun mbatin bilih kulá badhé pejah ing mriku.
Salajengipun kulá rèflèks nganggé naluri primitif kulá, kulá mbalik badan lajeng nyolok matanipun cèlèng wau, lajeng kulá énggal tangi lan kulá tendhang cèlèng wau, nembé cèlèng wau mlajar, kulá slamet.
Wekdal semanten kulá dèrèng nggalbo badan kulá. Kulá taksih kebak adrenalin lan boten kraos punápá-punápá. Kirang langkung satunggal menit kulá nembé ningali ngandhap lajeng ningali samparan kulá sampun suwèk mbiká wiyar… rahipun banjir boten kinten-kinten.
Wekdal semanten kulá taksih menggalih oké kulá saget mlampah wangsul nggriyá. Nanging naliká adrenalin sampun sirná, kulá ambruk nggléthak ing siti,” makaten André.
Mawi ponselipun André taksih saget nilpun nomer alarm. Bagja-bagjanipun André, piyambakipun énggal kepanggih déning juru njagi wilayah mriku, lajeng dipunbetá dateng Griyá Sakit Isala ing kuthá Zwolle. Dalu wau ugi piyambakipun dipunoperasi, cacahipun ngantos wonten 60 jahitan.
“Menawi panjenengan suwèk ing bagéan wentis, pikantuk pendarahan arteri, panjenengan boten saget slamet, sampun sédá ing mriká,” makaten ngendikanipun dokter.
Miturut katerangan De Stentor, kadadosan cèlèng nyerang manungsá boten kathah. Nanging naliká taun 2017 naté wonten priyantun Jerman sedá amargi dipunsruduk cèlèng ing mriku panggénan. Naliká semanten piyambakipun taksih mbedhag cèlèng, lajeng satunggal cèlèng ingkang tatu nyerang piyambakipun. (es/es)