DEN HAAG – Párá ibu ingkang bobot utawi ibu hamil (bumil) aman pikantuk suntik vaksin Covid-19, makaten kaserat ing dhawuh énggal ingkang dipunanggitaken déning pokja Covid-19 & Ibu Bobot, saking Federatie Medisch Specialisten/FMS (Federasi Spesialis Medis), dinten Setu (24/4/2021).
Sadèrèngipun saking tetimbangan keslametan, dipunaturaken dhawuh supados párá ibu ingkang bobot kanthi penyakit kabektá mawon ingkang dipunsuntik vaksin.
“Sapuniká kitá sampun pirsá bilih ing Amerika wonten 90.000 ibu bobot ingkang dipunsuntik nganggé salah satunggaling vaksin mRNA (Pfizer utawi Moderna) tanpá akibat susulan. Pramilá wiwit sapuniká sedáyá ibu bobot pikantuk dhawuh supados dipunsuntik vaksin, langkung saé nganggé vaksin mRNA,” makaten FMS.
Miturut FMS, Déwan Keséhatan ugi sampun ngidini vaksinasi kanggé párá ibu ingkang nyusoni, sarèhning sampun kasunyatan bilih vaksin boten mlebet ing susu ibu.
Dhawuh énggal puniká dipunanggitaken déning párá wakil saking organisasi ingkang lenggah ing pokja Covid-19, antawisipun Nederlandse Vereniging voor Obstetrie & Gynaecologie/NVOG (Pakumpulan Obstetri & Ginekologi Walandi), Koninklijke Nederlandse Organisatie van Verloskundigen/KNOV (Organisasi Bidan Karajan Walandi), sáhá Nederlandse Vereniging voor Kindergeneeskunde/NVK (Pakumpulan Dokter Anak Walandi).
Ugi Nederlandse Vereniging voor Medische Microbiologie/NVMM (Pakumpulan Mikrobiologi Medis Walandi), Patiëntenfederatie Nederland (Federasi Pasien Walandi), het Rijksinstituut voor Volksgezondheid en Milieu/RIVM (Lembaga Nasional Keséhatan Masyarakat lan Lingkungan), lan Vereniging voor Hygiëne & Infectiepreventie in de Gezondheidszorg/VHIG (Pakumpulan Higiene lan Panyegahan Infeksi ing Keséhatan Masyarakat).
Sadèrèngipun dinten Kemis wingi Déwan Keséhatan Inggil Belgia ugi sampun paring dhawuh supados sedáyá ibu ingkang bobot énggal dipunsuntik vaksin Covid-19. Ugi ing Inggris párá ibu ingkang bobot sampun pikantuk lampu ijem supados dipunsuntik vaksin wau. (es/es)