BATANG – Bupati Batang Wihaji ngutamiaken Kepala Organisasi Perangkat Daerah (OPD), prangkat dhusun, párá panuntun agami, lan párá pangurus Pondok Pesantrèn mangké ten pérangan kaping kalih vaksinasi Covid-19.
“Pamréntah Kabupatèn sampun ngusulaken 21.000 sasaran kanggé vaksinasi pérangan kaping kalih minongká nglayani párá wargi. Dinten puniká sampun kitá priksá mesthèaken ten Kecamatan piyambak-piyambak ingkang panggènanipun mangké ten Puskesmas,” ngendiká Bupati Wihaji ten Ayo Semarang.
Saking pamriksan wau miturut Bupati kasilipun nggih puniká palaksanan vaksinasi sampun mathuk kalih Standar Operasional Prosedur (SOP) lan cocok kalih rencana.
“Alhamdulillah párá kyai, mubaligh, párá panuntun masyarakat, kepala dhusun saprangkatipun lan párá pangurus pondok pesantrèn saget pikantuk prioritas utami dipunsuntik vaksin,” makaten Bupati Wihaji.
Éwodènten pérangan salajengipun mangké badhé nuju párá tiyang dagang ten peken lan párá guru.
“Dugi dinten kálá wingi ingkang sampun pikantuk vaksin minongká nglayani wargi sampun wonten 2.079 tiyang saking target kirang langkung 3.000 tiyang,” makaten Bupati Wihaji.
Sawetawis Kepala Dinas Keséhatan Kabupaten Batang dr Muchlasin nerangaken bilih vaksin Covid-19 saking Provinsi Jawa Tengah ingkang nembé dipuntampi wonten 800 vial kanggé suntik vaksin kaping kalih.
“800 vial puniká kanthi dosis tikel 10, saénggá dinas tegesipun pikantuk kathahipun 8.000 dosis vaksin Covid-19,” makaten dr. Muchlasin.
Sadèrèngipun Bupati Wihaji ugi paring idin sekolah wonten ing wilayah ijem Covid-19 saget nindakaken malih wulang-piwulang adhep-adhepan wiwitan sasi Maret 2021.
“Paring piwulang adhep-adhepan wonten ing sekolah dipunmathukaken kalih kahanan panyebaran Covid-19 utawi ingkang kalebet wilayah ijem Covid-19,” ngendiká Bupati Wihaji kados kapethik saking Kompas (24/2).
Bupati Wihaji maringi tulaádhá bilih panyebaran Covid-19 wonten ing dhusun Gerlang lan dhusun Prantèn, Kecamatan Bawang, Kabupatèn Batang, kaserat nul kasus. Pramilá sekolah wonten ing dhusun kekalih wau dipun aturi saget ngawontenaken malih piwulangan adhep-adhepan.
“Kulá mbayangaken satunggal taun kapengker puniká wonten masalah ingkang kulá kinten badhé mengaruhi ngguláwentahing karakter bongsá kitá,” makaten Bupati Wihaji.
Bupati Wihaji kagungan jalaran piwulangan adhep-adhepan dipunawontenaken malih amargi kathah alangan ingkang dipunpanggihi naliká pangetrapan piwulangan saking tebih utawi pembelajaran jarak jauh (PJJ).
“Kulá boten saget mbayangaken guru-guru ingkang tugas mulang wonten ing Prantèn lan Gerlang, wong madosi sinyal mawon angèl,” Bupati Wihaji nambahaken.
Kanggé nyegah wontenipun klaster énggal Covid-19, miturut Bupati kegiatan sekolah adhep-adhepan kedah ndhèrèkaken pranatan ingkang sampun dipuntemtoaken.
“Kulá nyuwun Pak Kadis Pendidikan lan Kabudayan ndamel pakem, ndamel serat katerangan nganggé materai dipuntapakastani déning tiyang sepuh lan pengawas sekolah, saénggá piwulangan adhep-adhepan boten ndadosaken masalah ten wingking dinten,” makaten Bupati Wihaji.