DEN HAAG – Vera Bergkamp (D66) kadapuk dados pangarsá énggal Tweede Kamer. Piyambakipun pikantuk 74 saking 139 swanten.
Pilihan pangarsá énggal Tweede Kamer (parlemen Walandi, red) saget rampung satunggal puteran amargi Vera Bergkamp langsung pikantuk swanten mayoritas. Kandhidhat sanèsipun Khadija Arib (PvdA) pikantuk 38 swanten lan Martin Bosma (PVV) 27 swanten.
“Puniká kinurmatan sáhá tanggung jawab ingkang ageng sanget, nanging kulá ngraos sumringah dados pangarsá panjenengan. Kulá badhé nindakaken kanthi sasaé-saénipun,” makaten pangarsá énggal Vera Bergkamp sasampunipun pamilihan, kados kapethik saking situs resmi Tweede Kamer tweedekamer.nl dinten Kemis (8/4/2021).
Bergkamp ngaturaken matur nuwun dumateng pangarsá Tweede Kamer sadèrèngipun nggih puniká Khadija Arib (PvdA), ingkang miturut Bergkamp sampun makaryá kanthi temen ing taun-taun kapengker.
“Kulá jumeneng ing mriki boten atas nami D66, kulá saèstu-èstu pangarsá kanggé sedáyá 149 anggota Tweede Kamer. Kulá mangertosi bilih ingkang kitá adhepi awrat sanget. Kasus tunjangan, pindhahan, tambah dados 17 fraksi, lan pagebluk Corona,” makaten Bergkamp.
