DEN HAAG – Tweede Kamer (parlemèn Walandi, red) taksih dèrèng karuan nanggepi kersánipun kabinèt ingkang dipunaturaken dinten Selásá kanggé ngèndelaken lockdown.
Kersá kabinèt wonten ing gangsal jangkah badhé mangsulaken gesang masyarakat mèh normal malih kados sawaunipun, kados dhahar ing restoran lan ngrawuhi ulem-uleman. Nanging sapuniká dèrèng karuan punápá jangkah kaping sepindhah tanggal 28 April saget kalaksanan.
Sawetawis puniká kabinèt sampun wira-wiri ngersaaken kalonggaran lockdown, kados ngidinaken restoran lan café saget biká malih, nanging kedah mbatalaken malih sarèhning ongká Corona taksih inggil.
Minggu kapengker sampun bocor bilih kabinèt badhé ngèndelaken jam malem mélai 21 April, nanging ugi boten siyos. Tanggal énggal kanggé nglonggaraken lockdown, 28 April, sawetawis puniká ugi dèrèng temtu.
“Kitá nggadhahi pangajeng bilih saget sakedhik tanggal 28 April, nanging dèrèng kapestèn,” ngendiká Perdana Menteri demisionèr Mark Rutte ing ngarsaning Tweede Kamer naliká debat Corona dinten Kemis (15/4/2021).
“Kitá pirsani saben minggu, nanging boten tansah nganggé konferènsi pers. Kitá ngersaaken menawi saget 28 April, nanging puniká sanès garansi,” makaten PM Rutte.
Kabinèt nembé badhé mundhut jangkah kaping sepindhah menawi mindhakipun ongká Coroná sampun sirep.
Tweede Kamer wanti-wanti supados langkung ningali data, kados cacahipun vaksinasi lan cacahipun panggènan ing griyá sakit ingkang kalenggahan pasièn Corona. Migatosaken sedáyá wau, nglonggaraken lockdown taksih mokal, ngendiká Diederik Gommers, dinten Selásá.
“Kitá saèstu boten saget nglonggaraken sadèrèngipun sedáyá wargi yuswá 60+ sampun dipunvaksinasi,” makaten Gommers ing acara televisi Beau.
Miturut Gommers, kedah wonten keajiban kanggé nglonggaraken lockdown tanggal 28 April. Cacahipun pasien Corona ing griyá sakit dèrèng bakal ketingal kirang sadèrèngipun sasi Mei. Sawetawis RIVM matur bilih puncakipun sampun langkung.
“Tengárá ingkang mbingahaken,” makaten PM Rutte.