DEN HAAG – Nagari Walandi puniká alit, wiyaripun namung 41.865 km2 (Jawi Wétan: 47.799 km2), nanging saget dados nagari eksportir kasil tanèn paling ageng nomer 2 sajagad.
tanèn, dedagangan (Indonesia: pertanian, perdagangan)
Walandi puniká nagari eksportir kasil tanèn paling ageng sajagad, nomer kalih sasampunipun Amérika Serikat. Statistik taun 2018, Amérika ngèkspor US$ 164 milyar (Rp 2.296 trilyun) kasil tanèn utawi 9% saking dedagangan tanèn sajagad. Walandi nututi kanthi 6%. Jerman nomer 3, lajeng Brazil nomer 4 lan Ciná nomer 5.
Èkspor nagari Walandi paling kathah inggih puniká: 93% sekar, 78% daging ayam lan daging lembu, lajeng 43% daging babi dipunèkspor dateng máncánagari. Kathahipun èkspor wau kanggé pasar Uni Eropa, antawisipun 1/4 èkspor Walandi mlebet pasar Jerman.
Nagari Walandi ugi sebagéan ngimpor kasil tanèn saking máncánagari, ing mriki dipunolah, lajeng dipunèkspor. Pramilá ongká total èkspor langkung ageng malih. Taun kapengker nagari Walandi ngèkspor kasil tanèn € 94,5 milyar (Rp 1.606,5 trilyun) sebagéan € 68,5 milyar (Rp 1.164,5 trilyun) kasil tanèn saking tanah Walandi piyambak, sanèsipun € 26 milyar (Rp 442 trilyun) saking olahan kasil tanèn máncánagari.
Ongká-ongká wau kapethik saking lapuran De Nederlandse Agrarische Sector in Internationaal Verband (Séktor Tanèn Walandi ing Gegayutan Internasional, red) saking Wageningen Universiteit ingkang dipunbabaraken ing wiwitan taun 2021.
95% Daging Kalep
Satunggaling tuládhá inggih puniká Walandi ngolah daging kalf (kalep, lembu enèm, red). Miturut Stichting Dier&Recht, ing Éropa saben taun wonten 1 jutá pedhèt-pedhèt alit dipunèkspor, cacahipun 800.000 pedhèt-pedhèt alit wau mlebet ing firma-firma Walandi. Pedhèt-pedhèt wau dipunagengaken ngantos dados lembu enèm lajeng dipunsembelèh, 95% daging lembu enèm wau dipunèkspor. Konsumèn Walandi boten pati remen daging lembu enèm.
Daging, sasampunipun sekar, inggih puniká produk paling wigatos Walandi ingkang dipunèkspor. Walandi ngèkspor € 9,5 milyar (Rp 161,5 trilyun) arupi sekar, taneman, winih sekar lan winih wit-witan. Lajeng ékspor daging € 8,8 milyar (Rp 149,6 trilyun). Éwodènten susu lan tigan ngasilaken € 8,6 milyar (Rp 146,2 trilyun).
Salajengipun ékspor sayuran € 7,3 milyar (Rp 124,1 trilyun) antawisipun tomat, paprika lan timun. Ugi woh-wohan. Walandi ngèkspor woh-wohan € 6,2 milyar (Rp 105,4 trilyun) antawisipun alpukat, anggur, pisang, pelem, pér, lan kacang-kacangan. Woh-wohan puniká sebagéan saking máncánagari lajeng dipunèkspor malih. Woh-wohan saking tanah Walandi piyambak namung 21%, antawisipun pér, arbei (strawberry), lan apel.
Ugi saking € 26 milyar èkspor kasil tanèn ingkang boten saking tanah Walandi piyambak inggih puniká cacao. Mawi pelabuhan Amsterdam, pelabuhan cacao paling ageng sajagad, Walandi ngèkspor 1 milyar kg wiji cacao saben taun. Cacao puniká dipunolah dèning pabrik ing Zaanstreek dados cacaopoeder (bubuk cacao), cacaoboter (mentégá cacao) lan produk cokelat.
Cacaopoeder lan cacaoboter dipunèkspor dateng nagari-nagari ing Eropa antawisipun Swiss, Belgia, lan Prancis. Kálá taun 2019 kapengker Walandi ngèkspor cacao lan produk cacao cacahipun wonten € 4,7 milyar (Rp 79,9 trilyun).