DEN HAAG – Sarèhning wonten bebáyá varian Omikron, Walandi lockdown malih wiwit 19 Desember jam 05.00 dugi sakirangipun 14 Januari 2022. Namung toko sembako lan apotik ingkang kénging biká.
Makaten dipunaturaken déning Perdana Menteri demisionèr Mark Rutte naliká maringi konferènsi pèrs dinten Setu dalu jam 19.00. Kabinèt sarujuk kaliyan Outbreak Management Team (OMT) ingkang ngaturakan pirembag supados pamréntah netepaken pranatan lockdown kenceng kanggé nanggulangi virus Corona varian Omikron.
“Omikron nyebar langkung cepet tinimbang ingkang kitá kinten,” ngendiká PM Rutte kados kapethik saking siaran televisi NOS dinten Setu dalu (18/12/2021).
Pramilá wiwit dinten Ngahad énjing jam 05.00 sedáyá toko ingkang sanès sembako, jasa, sáhá sekolah/universitas kedah tutup. Lajeng boten kénging nampi tamu langkung saking 2 per dinten, sadèrèngipun saget nampi 4 tamu. Kompetisi olahrágá profesional kénging mlampah, nanging tanpá publik.
Cethá sanget pamréntah kaliyan OMT kuwatos babagan virus Corona varian Omikron ingkang nyebar kanthi cepet. Párá ahli wanti-wanti supados sedáyá kedah tutup kajawi toko sembako lan apotik mawon ingkang kénging bika. Kabinèt saget nampi pirembag saking OMT makaten.
Tegesipun bilih antawisipun horéca (hotel-rèstoran-café, red), toko sanèsipun sembako lan apotik, lajeng séktor olahrágá lan séktor kabudayan kedah tutup. Jadwal kompetisi profesional kénging tetep mlampah nanging tanpá publik. Ugi sedáyá sekolah manengah sáhá lembaga piwulangan sanèsipun kedah tutup. Éwodènten sekolah dhasar sampun tutup sadèrèngipun libur Natal.
Pranatan lockdown puniká badhé dipuntingali malih mangké tanggal 3 Januari 2022, punápá kinten-kinten sekolah sampun saget bika malih. Panggénan layanan kanggé párá laré pra sekolah tetep kedah tutup, kajawi kanggé putrá-putri ingkang tiyang sepuhipun ngastá pakaryan ingkang boten saget dipuntilar.
Lajeng kempal-kempal grumungan ing jawi griyá paling kathah 2 tiyang, ugi ing dalem griyá kénging nampi tamu paling kathah 2 tiyang. Namung sadangunipun dinten riyáyá Natal lan Tahun Énggal saget kénging nampi tamu paling kathah 4 tiyang.
Pranatan énggal puniká ngagètaken lan drastis sanget kanggé masyarakat. Kabinèt mesthi bakal alesan bilih piyambakipun boten gadhah pilihan sanèsipun ngadhepi kasunyatan Omikron sapuniká sampun nyebar. Lajeng amargi kabinèt ugi mirsani bilih cadangan ing griyá sakit sampun telas, pramilá kabinèt boten karsá mundhut risiko punápá kémawon. Piyambakipun sapuniká mundhut ingkang pestèn tinimbang ingkang dèrèng pestèn. Kanthi makaten nembé kaping sepindhah puniká kabinèt boten nepis gelombang nanging nyobi nyegah