DEN HAAG – Kabinèt demisionèr Walandi netepaken pranatan ènggal arupi lockdown sebagéan kanggé ngerèm panyebaran virus Corona ingkang muntab malih.
Pranatan énggal wau dipunaturaken déning Perdana Menteri Mark Rutte sareng kaliyan Menkes Hugo de Jonge mawi konferènsi pèrs ing Den Haag dinten Jemuah dalu utawi Setu énjing (13/12) WIB.
Pranatan puniká katerapaken langsung dinten Setu 13 Nopember 2021 jam 18.00 sakirangipun dugi dinten Setu 4 Desèmber, nanging taksih nenggá pangesahan saking Tweede Kamer (parlemèn). Kabinèt badhé mriksá kahanan malih mangké tanggal 3 Desèmber.
Cekak aosipun pranatan énggal wau makaten:
- Kedah njagi let malih 1,5 meter ing panggènan-panggènan ingkang boten wajib kartu Corona.
- Kedah nganggé masker ing panggènan-panggènan ingkang boten wajib kartu Corona.
- Layanan sáhá toko-toko sanès bahan pokok, kados toko sandhangan, salon, casino, jam 18.00 kedah tutup.
- Réstoran, café, toko-toko bahan pokok kados supermarkèt, toko kéwan, toko obat, kénging bika dugi jam 20.00.
- Mlebet réstoran, café, wajib nedhahaken kartu Corona sáhá wajib lenggah ingkang tetep mboten pindhah-pindhah.
- Karaméan kedah tutup jam 18.00, wajib nedhahaken kartu Corona lan lenggah tetep, paling kathah 1.250 tiyang.
- Wajib tutup jam 18.00 boten kanggé tontonan seni lan budháyá kados bioskop, teater, konsèr.
- Tandhing olahrágá amatir lan profèsional boten kénging wonten penonton.
- “Pirembag makaryá ing griyá” dados “Makaryá ing griyá kejawi pancèn boten saget.”
- Nampi tamu paling kathah 4 tiyang per dinten.
- Menawi wonten anggota kaluargi katularan, milá sedáyá kedah karantina, ugi kanggé ingkang sampun vaksin lan dèrèng vaksin.
- Kanggé sekolah menengah, sekolah inggil lan universitas ingkang kénging hadir paling kathah 75, boten kalebet personel.
Sarèhning Covid-19 muntab malih pramilá kabinèt netepaken pranatan teges kados makaten kanggé ngerèm panyebaran virus Corona lan nyegah griyá sakit kuwalahan nampi párá wargi ingkang sakit.
Panularan nyebar-nyebar malih amargi kontak antawis tiyang. Supados saget nglindhungi párá kawulá tumrap panyebaran virus Corona pramilá kabinèt damel pranatan tambahan. Pranatan puniká mligi kanggé ngirangi kontak saben dinten, antawisipun gesang sadinten-dinten wekdal siang (sekolah, makaryá, olahrágá, lan sapanunggalanipun) sasaget-sagetipun kedah tetep mlampah, ewodènten gesang wanci dalu dipunwatesi.